Sulmi kibernetik nga Irani ka paralizuar të gjitha pikat e kalimit kufitar të Shqipërisë.
Mësohet se sulmi është evidentuar nga specialistët e policisë mbrëmjen e të premtes rreth orës 22:00, ndërsa kjo ka bllokuar punën e pikave kufitare të Kakavijës, Kapshticës, Qafë Botës, Qafë Thanës, Portin e Durrësit dhe Portin e Vlorës.
Drejtuesi i agjencisë së biletave në portin e Vlorës, Agron Brati tha se për shkak të kësaj situate do të ketë vonesa në nisjen e tragetit.
“Sistemi ka rënë që dje, autobusët i kanë nisur listat mbrëmë natën. Kemi punuar gjithë natën në mënyrë manuale. Pasagjerët që vijnë sot i regjistrojmë gjithashtu manualisht. Nuk kemi zgjidhje tjetër. Kjo është hera e parë që përballemi me këtë problem. Për fat të keq nuk kemi as internet. Kjo situatë do sjell vonesa në nisjen e tragetit pasi edhe policia po i regjistron me dorë. Po mundohemi mos të krijojmë vonesa”, thotë Agron Brati.
Kryeministri Edi Rama, përmes një njoftim në Twitter, konfirmoi se Irani ka kryer një sulm kibernetik ndaj sistemit.
“Një tjetër sulm kibernetik nga të njëjtët agresorë, tanimë të ekspozuar dhe dënuar prej vendeve aleate e mike të Shqipërisë, është shënuar mbrëmë mbi sistemin TIMS! Ndërkohë vazhdojmë punojmë përditë pa orar me aleatët për t’i bërë të papenetrueshme sistemet tona digjitale”, shkroi ai në Twitter.
