Nga Boldnews.al
“Ne përulemi para veprës të Elisabeth II, e cila ka zënë një vend të veçantë më zemrën e çdo hasjani. Faleminderit Mbretëreshë. U prehsh në paqe. Mbetesh e paharruar për ne!” Kjo është një pjesë e statusit ngushëllues të kreut të Bashkisë së Hasit, Liman Morina. Mbreteresha u nda nga jeta në moshën 96-vjeçare, por ajo rron dhe do të rrojë në zemrat e çdo Rilindasi që arriti të shpopullojë vendin duke detyruar mijëra të rinj të ikin drejt Anglisë.
Në elitën politike, qoftë edhe atë lokale, u dhembi në shpirt lajmi se Mbretëresha Elizabeta II ishte e sëmurë dhe mosha e saj 96-vjeçare mund të mos e lejonte të kishte më shumë ditë jetë. Ky lajm i trishtë erdhi zyrtarisht katër ditë më parë, thuajse në të njëjtën kohë kur një video qarkulloi në rrjetet sociale teksa tregonte dhjetarë emigrantë shqiptarë që po mbyteshin në Kanalin La Mansh, në tentativë për të shkuar drejt Anglisë.
Nëse dhjetë minuta më vonë do kishte shkuar skafi i shpëtimit me autoritetet franceze atëherë Limani, Edi,, Elisa dhe të tjerë do ktheheshin si “pronarë” të agjencive funarale, me lule në duar për jetët e humbura të emigrantëve.
Po do përloteshin, gati i kanë edhe fjalimet, buqetat me burbuqet nga pas për të thënë: “Opozita të mos përdorë tragjedinë për të bërë politikë”… E ashtu përlotshëm, tre ditë do zgjaste çudia. Të dalë kush të protestojë se brinjët u thyhen nga shkopinjtë dhe fryma do i merret nga gazi lotsjellës…
Tani është koha të vajtohet ikja e morarkes Britanike. Dhimbje për ata mjeranë që me krenari kryebashkiaku Rilindas thotë se “po ndërtojnë jetën në Angli”- që sipas tij “i hapi dyert, duke i pritur”.
Në Has është e vështirë të gjesh djem mbi 16-35 vjeç. Ata pak që kanë mbetur quhen “çunat e sakrifikuar” të pleqërisë së prindërve. Paundët nuk u mungojnë, makinat me timonin Anglez duket sikur janë në hapitatin e tyre. Zia është pak në Has, Kukës apo Burrel, ku vështirë se gjen një familje që nuk ka të paktën një fëmijë si emigrant në Angli, i cili ka shkuar palë në kamionë, apo me këmbët në ujë majë gomoneve që janë kthyer udhëtimet e shopeshta të ramës me linjë Tiranë-Beograd.
Ndër ngushëllimet më të veçanta që vijnë nga kjo botë e humbur me sytë drejt Londrës, ishte mesazhi i kryebashkiakut të Hasit, që nuk është çudi që në të ardhmen të kërkojë binjakëzimin e dy bashkive “Londër-Has” apo të bëjë edhe marrëveshje futbollistike Çelsi-Hasi. Po mendojnë t’i ngrenë një përmendore mbretëreshës Elisabeta II, para se morti të trokasë pikërisht nga fatkeqët që po ikin në çdo mënyrë e mjet nga ky vend që krenohet nëpërmjet zyrtarëve të saj për vrasjen e shpresës dhe shpopullimin e vendit.