Fondi Shqiptar i Zhvillimit (FSHZH), i drejtuar nga Dritan Agolli, vijon të mbetet në qendër të vëmendjes për sa i përket tenderave të dyshimtë.
Përmes një dokumenti që mban datën 6 Shtator, FSHZH ka njoftuar fituesin e tenderit me objekt “Transformimi urban në hapësira publike kryesore (rajoni 3 dhe 4). Ndërhyrje të transformimit urban – Shëtitorja Tushemisht dhe përmirësimi i segmentit rrugor Tushemisht-Dogana- Shën Naum” dhe fond limit “416,666,666.00”. Kohëzgjatja e kontratës parashikohet 12 muaj, referuar dokumentit zyrtar në APP të njoftimit të tenderit.
Në procedurën e prokurimit që është zhvilluar “e kufizuar” (ku operatorët ekonomik mund të kërkojnë të marrin pjesë dhe vetëm ata që ftohen nga autoriteti kontraktues mund të dorëzojnë një ofertë), kanë marrë pjesë dy kompani: “4 A-M” dhe “Gjikuria”.
Gjikuria është skualifikuar pasi vlera e ofertës e paraqitur është mbi fondin limit.
Fituese është shpallur “4 A-M” me ofertë sa gati 99 përqind e fondit limit: 415,969,909.5 lekë pa tvsh.
Lidhur me tenderin ka reaguar dhe gazetari i ekonomisë Klodian Tomorri, i cili e cilëson “një vjedhje”. Sipas tij, kemi të bëjmë me një garë fiktive me fituesin e tenderit që ka qenë i paracaktuar.
“Tenderat ne kete vend jane bere qesharake. Shikojeni pak kete, eshte tenderi per shetitoren e Tushemishtit qe e ben Fondi i Zhvillimit. Me procedure te kufizuar madje. Se pse duhet tender i kufizuar ketu, keta e dine? Por nejse. Fondi limit i tenderit ka qene 416.6 milione leke (3.56 milione euro). Ne gare jane thirrur dy kompani, 4 A-M dhe Gjikuria. 4 A-M ka dhene oferte 415.9 milione leke sa 99.8 per qind e fondit limit. Gjikuria ka dhene oferte me 465 milione leke ose 50 milione leke mbi fondit limit. Dmth Gjikuria ka hyre per mbushes topi, vetem sa per te mos u dukur qe tenderi ka qene pa gare. Dhe tenderin e fiton 4 AM, me 99.8 per qind te fondit limit. Dhe keshtu mbeten te gjithe te kenaqur. Kompania fituese eshte e kenaqur se e mori tenderin ne koke. Humbesja po ashtu e kenaqur se ka hyre me vetedije per te humbur, ne kembim te ndonje nderi diku tjeter. Me fund, edhe drejtori i Fondit ka mbetur i kenaqur se tenderi i shkoi vaj dhe perfundoi atje ku duhej, brenda gardhit dhe njohjeve te tij nga e kaluara. I vetmi qe e ha eshte populli, qe po i rjepin edhe qindarkat. Ja pra kjo pune mbaroi. Tani o burra se kemi stallen e derrave te kryeministrit, qe do e beje prape Fondi. Ja me kete stil si ky tenderi i Tushemishtit”, shkruan Tomorri në një postim në rrjetet sociale.
“Tani nje gje nuk e kuptoj? Pse nuk i beni me prokurim te drejteperdrejte se eshte me e ndershme. Caktojeni vete vleren dhe zgjidhni se kujt do ja jepni. Ketu cdo tender po behet veper penale e grabitjes ne shkalle industriale. Dhe duhet nje rregullim ligjor per keto kompanite qe bashkepunojne neper tendera si ky rasti konkret. Se keto gjera behen te gjitha me marrëveshje”, shton ai.
