Komuniteti lokal i Rodosit është tronditur nga vrasja e biznesmenit shqiptar, Xhani Topalli 46-vjeç. Sipas autoriteteve greke autorët e vrasjes së babait të tre fëmijëve të mitur janë një biznesmen 53-vjeçar dhe djali i tij 20-vjeçar.
46-vjeçari shqiptar ishte shpallur në kërkim që në mbrëmjen e 28 gushtit. Pasi familjarët e tij nuk mundën të kontaktonin me të prej disa orësh, ata vendosën të kërkojnë ndihmën e policisë për gjetjen e tij. Njerëzit në ishull që e njihnin familjen e shqiptarit dhe rrethi i tij i ngushtë e dinin që në fillim se zhdukja e tij nuk do të kishte një fund të lumtur.
Pas provave të mbledhura gjatë hetimeve, policia arriti të identifikonte autorët e vrasjes së shqiptarit 46-vjeçar. Gjatë marrjes në pyetje ata pranuan krimin që kishin kryer, duke treguar edhe vendin e vrasjes.
Familjarët e shqiptarit janë nisur drejt Shqipërisë pasi kanë vendosur që lamtumira e fundit 46-vjeçarit t’i jepet në Atdhe. Ata pretendojnë se vrasja ka qenë e paramenduar pasi autorët i kishin borxh 100.000 euro shqiptarit.
Avokati i familjes shqiptare thotë se ishin goditjet në kokë ato që rezultuan fatale për 46-vjeçarin. Ekspertiza ka zbuluar njëri prej autorëve e mbante të lidhur me litar shqiptarin dhe tjetri e rrihte deri sa ai humbi jetën.
