Fadromat e Inspektoriatit të Mbrojtjes së Territorit kanë vazhduar aksionin ditën e sotme në ‘Prestige Resort’ për të tretën ditë radhazi.
Pas prishjes së dy pishinave të këtij resorti, sot fadroma kishte në shënjestër pistën e kompleksit, një zonë pedonale për pushuesit, që sipas inxhinierëve të “Prestige Resort” është ngritur për të penguar erozionin, në një zonë bregdetare, ku deti vazhdimisht ka hyrë në pjesën e rërës.
Madje ka qenë vetë kryeministri Edi Rama, i cili gjatë një nga vizitave të shumta në këtë resort ka dhënë ide për ngritjen e saj.
Por firma e kryeministrit Edi Rama nuk është vetëm te projekti i “Prestige Resort”.
Një vizatim i firmosur madje është lënë nga ai për pronarin edhe për ishullin në pishinën e shkatërruar tashmë.
Ishte skica e kryeministrit që ai e ka quajtur “pema e jetës” që më pas do të implementohej. Madje sipas mediave në fjalë, ishte vetë Rama që ndryshoi ngjyrën me të cilën ishte lyer kompleksi.
Skicat e publikuara nga mediat e biznesmenit tregojnë afërsinë që ai ka pasur me kryeministrin, miqësi që tashmë është thyer për arsye që mbeten të paqarta.
Çfarë ka mbetur tashmë pas aksionit të jashtëligjshëm të IKMT-së janë vetëm rrënoja.
