Donald Trump, nga një tubim në Pensilvani, e quajti presidentin Joe Biden një armik të Amerikës.
“Ai është një armik i shtetit. Ju dëshironi të dini të vërtetën? Armiku i shtetit është ai dhe grupi që e kontrollon atë”- tha ai.
Komentet e Trump vijnë pasi Biden i quajti mbështetësit e republikanit si një rrezik ekzistencial për demokracinë.
Nga tubimi i Pensilvanisë, i cili është i pari që prej mësymjes së FBI-së në shtëpinë e tij, Donald Trump akuzoi Departamentin e Drejtësisë se po vepron si një mashë e atyre që nuk duan që republikani të rikandidojë për president.
“Demokratët radikalë po angazhohen në një përpjekje të dëshpëruar për të më penguar të kthehem në Shtëpinë e Bardhë, pasi ata e dinë se do ta pastroj përsëri këtë rrëmujë. Ata duan të na ndalojnë të përfundojmë misionin tonë për të rikthyer vlerat amerikane.
Kundërshtarët tanë i kanë bërë llogaritë gabim. Ky shpërdorim skandaloz i ligjit do të prodhojë një reagim të tillë që askush nuk e ka parë ndonjëherë. Lëvizja MAGA është më e madhja në historinë e vendit tonë, në historinë e botës. Ne e duam kombin tonë dhe ne do ta shpëtojmë kombin tonë nga njerëzit që përpiqen ta shkatërrojnë atë.”
