Nga BoldNews.al
Majat e rruspave ishin mprehur mirë. Mesazhi duhet të ishte i qartë: “nëse nuk je me mua, je armiku im”. Dy pishina e pësuan në kompleksin “Prestige Resort” në Golem.
Ato pishina, që një herë, dikur, jo shumë larg në kohë freskonin pushtetarë, pa pyetur për çmimin që gjithnjë për një sorollop të tillë kishte të shkruar ligjin e pashkruar: “falas dhe shërbim me përkushtim”.
INUK me frymën e re si ‘Dallëndyshe vjeshte” shkeli ligjin, jo nga veprimi, por nga pasoja që lanë pas.
U tha zyrtarisht se do të rikthenin hapësirën publike të brezit rënor dhe të pishave, por në fakt lanë pas disa pisha të shembura nga rruspa e pushtetit.
Ironikisht, ata që hodhën firmën për prishjen e dy pishinave mund të mburren para shefit të madh që janë besnikë të bindur të ‘Rilindjes’, por në fakt rrezikojnë deri në gjashtë muaj burg.
Jo vetëm fadromistët por inspektorë e drejtues të tjerë shembën pisha, dëmtuan lulishte dhe rrëzuan përtokë pemë dekorative.
Nenet 205 dhe 206 të Kodit Penal e kanë të përcaktuar specifikisht që dënohet me gjobë deri në gjashtë muaj burgim kushdo që dëmton ose pret pemë dekorative, lulishte dhe dru frutorë.
Përse institucionet shtetëtore në emër të zbatimit të ligjit shkelin ligjin. Në rastin e IKMT, gjatë procesit të shembjeve duhej dhënë mesazhi pasi e kishin të qartë se nuk ishte një punë rutinë.
Mllefi dhe zelli i atyre që janë ekzekutorë të urdhrave gojor apo shkresor, kapërceu limitet. Iu futën fadromçe çfarë gjetën para duke u marrë jetën pishave dhe druve të tjerë dekorativ në shkelje të ligjit.
Kjo është ajo pjesëz e vogël që tregon diçka të madhe mbi mënyrën qeverisëse që nuk duron tu cënohet edhe për pak imazhi.
Ajo që lenë pas është shkatërrimi, shantazhi dhe gjuha e koduar që del nga i njëjti fjalor me atë të mafies.
Disa pisha të shembura përdhe si zell inspektorësh, shkelën dy nene të ligjit, që mëse nuk do ishte në duart e “Maliqëve” dhe “Dallëndysheve” më së paku ekzekutuesit do paguanin një gjobë të rëndë.
Këtë radhë gjoba presion ka shkuar tjetërkund, viktimë e kamikazllëkut qeveritar me armën rruspë, mbetën pisha dhe lulishte.
