Alexandre Pato konsiderohej një nga lojtarët më të talentuar të një dekade më parë, madje shumë e shikonin si një Top të Artë të ardhshëm që për shumë arsye nuk arriti të ngjitej në majë. Ish-sulmuesi brazilian rrëfen se dëmtimet e penguan fizikisht por edhe psikologjikisht për të bërë hapin e madh.
“Kur shkoja në stërvitje trembesha se mund të dëmtohesha dhe mendoja që nëse do të ndodhte, nuk do t’i tregoja askujt. Sapo rikuperohesha nga një problem muskular, dëmtohesha në gju ose kavilje. Nuk dëshiroja të largohesha asnjëherë nga skuadra, doja t’ua bëja qejfin të gjithëve por me kalimin e kohës nuk kisha më besim te trupi im”, thekson ish-sulmuesi i Milanit, një nga zhgënjimet më të mëdha të futbollit botëror.
“Ndoshta nuk u bëra lojtari më i mirë i botës por kam pasur një jetë fantastike me familjen time. Jam në paqe me veten. Kam një bashkëshorte që e dua dhe ky është Topi im i Artë”, përfundon ai.
