Një 35-vjeçar i cili shpërndante drogëra të forta në disa zona të Tiranës ka rënë në prangat e policisë.
Arrestimi i tij u bë falë operacionit policor të koduar “Miks”. I arrestuari është 35-vjeçari me inicialet D.L., banues në Tiranë.
Gjithashtu u procedua penalisht në gjendje të lirë shtetasi G.D., 27 vjeç, banues në Tiranë, për veprën penale “Moskallëzimi i krimit”.
“Në afërsi të Brrylit, shërbimet e Policisë kanë lokalizuar shtetasin D.L. dhe shtetasin G.D. Gjatë kontrollit fizik ndaj shtetasit D. L. dhe kontrollit në banesën e tij, u gjetën dhe sekuestruan, në cilësinë e provës materiale, lëndë të dyshuar narkotike, rreth 65 tableta ekstazi, sasi lënde narkotike MDMA dhe LSD, sende që shërbejnë për konsumimin e lëndëve narkotike dhe shuma parash që dyshohet se janë përfituar nga ky aktivitet kriminal”, njofton policia.
Nga veprimet hetimore ka rezultuar se ky shtetas pasi siguronte lëndët narkotike ekstazi, kokainë, LSD dhe MDMA, i shpërndante ato në zona të ndryshme të Tiranës, kryesisht në afërsi të Bllokut, Unazës së Re dhe Ish-stacionit të Trenit.
