Mesditën e së martës është arrrestuar personi i pestë i përfshirë në përdhunimin e 11-vjeçres në Prishtinë.
”Si rezultat i punës, angazhimeve dhe hetimeve intensive nga Policia e Kosovës, tani edhe personi i pestë i dyshuar i cili ka qenë në kërkim policor është duke intervistuar nga hetimet rajonale të DRP Prishtinë. Të gjitha veprimet e mëtejme policore lidhur me të dyshuarin i cili dyshohet se është i përfshirë në rastin “dhunim” të ndodhur në Prishtinë, do të ndërmerren në bashkëpunim dhe koordinim me organet e drejtësisë”, thuhet në njoftimin e Policisë.
Nuk kanë qenë të pakta reagimet në Kosovë për këtë ngjarje të rëndë. Ministri i Drejtësisë Xhelal Sveçla u shpreh se personat e përfshirë do të përballen me drejtësinë.
Ndërsa presidentja, Vjosa Osmani në një reagim në rrjete sociale e vlerësoi ngjarjen si “akt tronditës e çnjerëzor”, ndërsa kërkoi “një hetim rigoroz dhe përgjegjësi para ligjit për kryesit e veprës”.
Sakaq, kryeministri i Kosovës Albin Kurti kërkoi dënim për përdhuniesit e vajzës vetëm 11-vjeç.
