Memphis – Agjentët federalë në Memphis kanë sekuestruar një objekt të lashtë egjiptian, me shumë mundësi 3000-vjeçar që ishte dërguar nga Evropa.
Doganat dhe Mbrojtja Kufitare e SHBA-së thanë se ato shtinë në dorë, vazon funerale të hyjnisë së quajtur Imsety më 17 gusht.
Vazot apo kavanozët kanopikë u përdorën nga egjiptianët e lashtë gjatë procesit të mumifikimit, për të ruajtur organet e brendshme të pronarit të tyre për jetën e përtejme. Zakonisht ato ishin të gdhendura nga guri gëlqeror ose ishin bërë prej qeramike.
Agjencia thotë se objekti u dërgua nga një tregtar te një blerës privat në SHBA dhe dërguesi bëri deklarata kontradiktore për vlerën e tij.
Ekspertët në Institutin e Artit dhe Arkeologjisë Egjiptiane të Universitetit të Memfisit ndihmuan në përcaktimin e origjinalitetit të artefaktit.
Agjencia thotë se vazoja funerale ka të ngjarë të jetë e periudhës nga viti 1069 p.e.s. deri në vitin 653 p.e.s.
Autoritetet thonë se objekti mbrohet nga traktate dypalëshe dhe është një import arkeologjik që i nënshtrohet sekuestrimit sipas Konventës për Zbatimin e Pronave Kulturore të vitit 1983.
Ai iu dorëzua Hetimeve të Sigurisë Kombëtare për ekzaminim të mëtejshëm.
