Qeveria i jep gradën “Kolonele” por Luiza Gega është ndoshta e vetmja atlete profesioniste që në kryeqytetin e saj nuk ka mundësi të stërvitet në një pistë tartani. Kampionen e Europës e presin me të gjitha nderimet në Kryeministri.
Kush më shumë e kush më pak nxituan të thurnin lavde për rekordmenen europiane sot që ajo ka kaluar mes mijëra vuajtjesh, që nga periudhat e gjata stërvitore në Dardhë e Kenia dhe deri tek puna në një nga pistat e pakta që i kanë ngelur vendit, atë të Elbasanit.
Ndryshe nga qyteti komshi, Tirana sot nuk ka asnjë pistë tartani me kushtet që i takojnë të stërvitet një kampione e një kalibri të tillë. Stadiumi “Selman Stermasi” që si për ironi ka mbiemrin e trajnerit të Luizës sot, nuk është në gjendje të presë as atletët amatorë ndërsa “Arena Kombëtare” nuk ka një pistë.
Luiza, ashtu si edhe Izmir Smajlaj e shumë kampionë të tjerë janë të detyruar të improvizojnë në kodra e male duke sakrifikuar shumë për të arritur majën e Europës, aty ku është Luiza sot dhe të gjithë i hedhin lule edhe pse dje ata që e ngrenë në piedestal sot, nuk i dëgjuan asnjëherë shqetësimet e komunitetit të atletikës për një pistë në kryeqytetin e Shqipërisë ku mirëqënia matet me metër kub beton dhe jo me metër linear pistë sportive.
Përveç rekordit europian në 3000 metra me pengesa, sot Luiza Gega ka edhe një rekord tjetër për të cilin ndoshta nuk është krenare, ajo është ndoshta kampionia e vetme europiane pa një pistë ku të stërvitet në qytetin e saj.
