Luiza Gega ka fituar medaljen e artë në Europianin e Atletikës që u zhvillua në Mynih. Gega u shpall kampione në 3,000 metra me pengesa me kohën 9’11”31.
Një finale pa histori (ashtu sikurse edhe gara e baterive dy ditë më parë), ku Gega “garoi” me veten, duke mos u dhënë asnjë shans rivaleve të saj ta arrijnë. Pas finishit, lotë gëzimi për atleten shqiptare, që mori flamurin kuqezi në krahë dhe e valëviti në gjithë pistën, duke festuar një triumf të jashtëzakonshëm për të. 33-vjeçarja bëri realitet ëndrrën e saj, duke u ngjitur në majën e podiumit.
Në vendin e dytë, me 4 sekonda vonesë u rendit atletja gjermane Lea Meyer dhe e treta ajo britanike Elizabeth Bird.
Gega, e cila ishte renditur e pesta në botë në këtë disiplinë një muaj më parë në botëror, konsiderohej favorite për medalje në finalen e sotme. Në botëror, ajo ishte atletja më e mirë nga Europa, ndaj shanset për një medalje të artë ishin të mëdha.
