Medikamentet mjekësore të kontrabanduara që mbanin në farmaci kanë vënë në pranga administratorin dhe farmacisten e një farmacie në Tiranë.
“Në kuadër të operacionit policor të koduar “Medicaments”, u arrestuan në flagrancë: Ermir Haxhia, 44 vjeç, administrator farmacisë dhe Geriana Bendaj, 27 vjeçe, me profesion farmaciste. Ata akuzohen për veprat penale “Kontrabanda me mallra të tjerë”, “Tregtimi dhe transportimi i mallrave që janë kontrabandë”, “Ruajtja apo depozitimi i mallrave që janë kontrabandë” dhe “Shkelja e të drejtave të pronësisë industriale”, njofton policia.
“Gjatë kontrollit të ushtruar në farmacinë në administrim të shtetasit E.H. dhe me farmaciste shtetasen G. B., shërbimet e Policisë gjetën dhe sekuestruan në cilësinë e provës materiale, sasi të konsiderueshme medikamentesh mjekësore, pa pullë fiskale nga Agjencia Kombëtare e Barnave dhe Pajisjeve Mjekësore”, shtuan të njëjtat burime.
