Nga Boldnews.al
Në dy ditë, katër të vdekur në Shqipëri, në dy ditë, dy të vdekur dhe një i plagosur në Ukrainën që ka luftë. E ne ja kaluam, e kapëm dhe e tejkaluam planit për këtë mes gushti. Atentati më i fundit është ai i vrasjes së dy personave në aksin Vlorë-Fier. Vranë, dogjën makinën, ikën e su panë. Si gjithnjë edhe këtë herë policia “krehu” zonën, por pa arritur deri në “depilim të plotë” që të shkonte në kapjen e autorëve. Skenari është i njëjtë, emrat ndryshojnë, statistikat e vdejeve rriten me armët që zbrazen kudo; në rrugë, në trotuar, në banesa, buzë detit, apo majë maleve.
Ministri i Brendshëm është zyrtarisht me pushime, kryeministri është gjithnjë me pushime, por këtë herë thotë se vendndodhjen e ka pikërisht në Dhërmi, qarku i Vlorës. Asaj rruge që u derdh gjak sot pritet të kalojë kreu i qeverisë, ministri i tij Çuçi dhe çdo ministre që ka zgjedhur të pushojë gjatë, pa vrarë mendjen e shpenzimeve ditore në plazhet e Jugut.
Rama duhet ruajtur dhe aty në atë kohë mund të kalonte çdo mjet tjetër dhe plumbat nuk kontrollohen aq lehtë, sidomos kur lëshohen breshërishëm, aq sa edhe ka marrë emrin si “plumb qorr” (nuk sheh kë zë). Rrugë me risk kjo e Vlorës…
Garda e Republikës duhet të shqetësohet seriozisht. Një mënyrë tjetër për të ardhur në Tiranë shëndoshë e mirë mund të jetë që t’i bjerë nga ana tjetër në aksin Himarë-Sarandë… Prit, edhe këtu telashe mund të dalin. A nuk ndodhi dy ditë më parë vrasje në Sarandë? Dhe për çfarë, një vend parkimi. Punë me zarar. Po nga i duhet rënë? Po sikur i gjithë taborri qeveritar të vendoset në një jaht luksoz nën ndonjë flamur të huaj dhe të kamuflohen në lundrimin Vlorë-Durrës?
Po mund të jetë lundrim i mbarë. Me atë rast i hedhin një sy gjithë vijës bregdetare dhe mund të gjendet ndonjë qushëze për tua dhënë “investitorëve strategjik” të Rilindjes. Kjo po, është mënyra e duhur. Vetëm në këtë rast ka një problem, duhet edhe udhëtim rrugor Durrës-Tiranë.
Jo, punë që nuk bëhet, edhe në këtë superstradë lloj e soj atentatesh kanë ndodhur. Megjithatë mënyrat e lëvizjeve në “kohë lufte” kanë strategë. Dikush nga personat e sigurisë mund të kalojë në planin “B”, duke bërë një devijim për nga Rinasi dhe më pas një kalim i shkurtër në Fushë-Krujë. Këtu u trash vertëte puna! Ky “strategu” i sigurisë se taborrit qeveritar duhet larguar menjëherë, sepse të kalosh në Fushë-Krujë është si të luash në “ruletën ruse”.
Po të ndiqet aksi tjetër Durrës-Elbasan? Jo, ehe kjo nuk shkon, dhe ku në Elbasan që vetëm dy netë më parë u vra një 33-vjeçar me “fajin” se pa si me inatë një grup të rinjsh ku njëri prej tyre vetëm 18 vjeç zbrazi koburen dhe e la të vdekur. Pikërisht këtyre ngjarjeve “rutinë” i druhen në Elbasan, se kur është krimi i organizuar ata qëllojnë kur këmbë Rilindasi nuk gjendet afër, sepse i ruajnë. Jemi në “luftë”. Mënyra më e mirë është mbërritja e gjithë kabinetit qeveritar me një helikopter, madje duke i vendosur edhe një kovë bosh, për të krijuar përshtypjen se po shkon të shuajë zjarrin diku. Mbaje dorën krim!
