Në automjetin e djegur tip “BMW”, të gjetur në aksin rrugor Levan-Tepelenë, që dyshohet se u përdor në atentatin e Vlorës, janë gjetur armë zjarri.
Në njoftimin e parë të policisë për ngjarjen, konfirmohet se bëhet fjalë për tre kallashnikov.
Ndërkohë, viktimat mbeten ende të paidentifikuar.
“Sot, rreth orës 09:50, në dalje të fshatit Panaja, në aksin rrugor Fier-Vlorë, në rrethana ende të pa qarta, dyshohet se janë vrarë me armë zjarri, dy shtetas ende të paidentifikuar, të cilët ndodhen brenda një automjeti tip ‘Benz’”, njoftoi policia.
Makina e djegur
Gjatë krehjes së zonës, shtuan të njëjtat burime, në fshatin Çerven, në aksin rrugor Levan-Tepelenë, nga shërbimet e Policisë është konstatuar duke u djegur një automjet i braktisur tip “BMW”, pa targa, i cili paraprakisht dyshohet se mund të jetë i autorit/ve të ngjarjes. Nga këqyrja paraprake e automjetit dallohen në brendësi të tij, 3 armë zjarri automatike.
Në një njoftim të dytë, policia saktësoi se mjeti i gjendur i braktisur dhe i djegur, pas verifikimit rezulton të jetë me targa të huaja italiane.
“Grupi hetimor nën drejtimin e Prokurorisë së Rrethit Gjyqësor Vlorë ndodhet në vendin e ngjarjes, ku vijon puna për zbardhjen dhe dokumentin e plotë të rrethanave të ngjarjes, identifikimin dhe kapjen e autorit/ve, si dhe identifikimin e dy shtetasve të gjendur pa shenja jete. Shërbimet e Policisë së DVP Vlorë, Delta Forcës e FNSH-së, në bashkëpunim me DVP Fier kanë ngritur pika kontrolli dhe po krehin zonën për të bërë të mundur kapjen e autorëve”, mbyllet njoftimi i bluve.
