Detaje të reja kanë dalë nga zhdukja e Ervis Martinajt. Familjarët e tij, konkretisht nëna dhe xhaxhai kanë denoncuar se kanë humbur çdo kontakt me Vis Martinajn, një person i shpallur në kërkim ndërkombëtar për shkak se akuzohet si pjesëmarrës në ngjarje të shumta kriminale.
Familjarët e Ervis Martinajt kanë shkuar mbrëmjen e djeshme në policinë e Kurbinit duke kërkuar prej tyre që t’ia gjejnë djalin pasi dyshojnë se mund t’i ketë ndodhur diçka e keqe pasi nuk kishin kontaktuar me të prej tre ditësh.
Xhaxhai i Ervisit, Faik Martinaj ka theksuar se njoftimin për zhdukjen e nipit ia ka dhënë një i afërm i tyre nga Puka.
Ai ka pohuar se me Visin nuk kishin komunikime në celular për shkak se ai ishte në kërkim ndërkombëtar, ndërsa komunikimet me të i kryenin nëpërmjet të afërmve që kishin kontakte fizike me Ervis Martinajn.
Çfarë tha xhaxhai në polici:
“Në lidhje me nipin tim, djalin e vëllait Ervis Martinaj, i cili është shpallur në kërkim nga Prokuroria e Posaçme Kunder Krimit dje rreth ores 22:00, jemi njoftuar nga një i afërmi jonë, që për arsye sigurie nuk dua të përmend emrin, i cili nuk ndodhet në Shqipëri, por është nga Puka, me ka vënë në dijeni se Ervisi është zhdukur dhe nuk kishte kontakte me të. Dua te theksoj se qe prej kohes qe nipi Ervisi eshte shpallur ne kerkim nuk kam patur asnje kontakt me te drejtperdrejt apo ne telefon, por vetem nepermjet personave te aferm. Ne si familje kemi dyshime se Ervisit mund ti kete ndodhur dica e keqe nga grupe kriminale qe kerkojne ta eliminojne. Ne kemi pritur deri diten e sotme qe mos kemi ndonje kontakt me nipin Ervisin por nuk kemi arritur te kontaktojme dhe nuk kemi asnje lloj informacioni per vendndodhjen edhe gjendjen e tij.
Sot ne dreke rreth ores 12, te shqetesuar lidhur me gjendjen e nipit Ervisit, kam njoftuar punonjesin e policisë se komisariatit kurbin pjetër Tuci per sa thashe me siper”.
Ky denoncim i familjarëve të Martinajt vjen pas disa vrasjeve të ndodhur në zonën e Fushë-Krujës ku target ishin njerëzit e Ervis Martinajt. Duket e paqartë situata edhe për faktin se Martinaj është prej muajsh në kërkim dhe janë organizuar disa herë operacione për kapjen e tij.
Burime bëjnë me dije se në kallëzimin e bërë nga familjarët e Ervis Martinajt, xhaxhai i tij ka zbuluar edhe një mesazh që atyre u ka ardhur në mënyrë indirekte nga ai: “Kujdes se do ketë kontrolle”.
Martinaj rezulton person i shumëkërkuar edhe nga autoritetet por edhe nga rivalët e tij, ndaj nuk përjashtohet as pista e inskenimit.
Kujtojmë se Ervis Martinaj është në kërkim ndërkombëtar me urdhër të SPAK, pas dëshmive të të penduarit të drejtësisë, Nuredin Dumani i cili ka thënë se Martinaj e kishte paguar për të vrarë Indrit Doklen. Ai ka thënë se 500 mijë euro do paguante Ervis Martinaj për këtë vrasje.
Ndërkohë Policia po heton nëse ka një inskenim nga ana e Martinajt apo vërtet mund t’i ketë ndodhur diçka.
Burimet policore kanë konfirmuar se kanë ngritur një grup të posacëm për të kuptuar çfarë ka ndodhur.
