Sipas Agjencisë Kombëtare të Mbrojtjes Civile, AKMC forcat operacionale u përballën me dy duzina vatrash zjarri, aktive anembanë vendit gjatë 24 orëve të fundit.
AKMC raportoi të hënën se për menaxhimin e situatës së zjarreve në vend po merren jo vetëm forcat e zjarrfikësve, por edhe forcat policore, ato të policisë bashkiake, forcat e armatosura dhe vullnetarë të thjeshtë.
“Sipas të dhënave nga qëndra kombëtare operacionale e emergjencave civile në Agjencinë Kombëtare të Mbrotjes Civile, gjatë 24 orëve të fundit, janë raportuar aktualisht 26 vatra zjarri, prej të cilave janë shuar vatrat në 15 bashki të ndryshme të Shqipërisë”, raportoi Robert Hysenllari, Drejtori i Gatishmërisë dhe Përgjegjësi ndaj Emergjencave pranë AKMC, në një postim në rrjetet sociale.
Përgjatë dy muajve të fundit, zjarret kanë qenë emergjencat kryesore në vend, kryesisht në zonat malore dhe masivet pyjore, por shpesh duke rrezikuar edhe zonat e banuara fare pranë shtëpive të banorëve vendas.
“Aktualisht janë të angazhuar 588 forca operacionale të shërbimit të emergjencave, forcat e armatosura, forcat bashkiake, forcat policore, shërbimi pyjor, dhe forca vullnetare”, raportoi Drejtori i Gatishmërisë dhe Emergjencave.
Eksperti i AKMC deklaroi se pranë vatrave të zjarreve ndodhen gjithashtu në aksion për shuarjen e tyre 49 mjete zjarrfikëse dhe helikopterë të Ministrisë së Mbrojtjes.
Bashkia Tiranë, bashkia Shkodër, bashkia Krujë dhe bashkia Mirditë kanë akoma vatra aktive të rrezikshme, ku njëri prej zjarreve masiv pyjor në Tiranë po rrezikon dhe banesat në afërsi të fshatit.
Ministria e Mbrojtjes deklaroi se disa prej këtyre zjarreve dyshohen si të qëllimshme, dhe u bëri thirrjeve banorëve t’i identifikojnë dhe t’i denonojnë këto zjarrvënie të qëllimshme pranë Policisë së Shtetit.
“Zjarri i fshatit Shpërdhesë konsiderohet i qëllimshëm, dhe banorët kanë bërë denoncim. Operacioni i shuajtjes së zjarrit po vijon akoma”, tha zoti Hysenllari.
“Iu bëjmë thirrje qytetarëve të denoncojnë pranë strukturavë të policisë së shtetit çdo rast të dyshuar për zjarrvënie të qëllimshme si edhe të tregojnë kujdes të shtuar në këto ditë me temperatura të larta në përdorimin e mjeteve ndezëse dhe çdo aktivitet tjetër që lidhet me zjarret”, përfundoi Hysenllari, duke shtuar se zjarrvënia e qëllimshme dënohet me ligj. /BIRN/
