Agjencia Kombëtare e Krimit është duke shqyrtuar pretendimet se Alban Jusufi, një ish-futbollist shqiptaro-suedez, i pezulluar me 5 vite nga gjykatat suedeze në vitin 2017 për trukime, kishte hedhur shuma të mëdha bastesh se Granit Xhaka do të ndëshkohej në ndeshjen kundër Ledsit më 18 dhjetor, ka shkruar mes të tjera edhe media angleze “Daily Mail”.
Jusufi, i cili ka luajtur edhe për klubin e Vllaznisë gjatë karrierës së tij, u shpall fajtor se i kishte dhënë një ryshfet prej 150 mijë paundësh portierit të AIK, Qiriakos Stamatopullos, që ai të luante keq në derbin kundër IFK Gotenburgut në vitin 2017.
Federata Suedeze e Futbollit e shtyu ndeshjen pas raportimit se do të trukohej. Ndërsa një hetim i gjerë solli shpalljen e tij fajtor dhe pezullimin me 5 vite nga futbolli 5 vite më parë.
Jusufi, i cili ka lindur në Angelholm të Suedisë ishte një sulmues, i cili karrierën e nisi pikërisht për klubin e vendlindjes, Angelholm (2001-03). Gjatë karrierës së tij ai veshi edhe fanellën e Vllaznisë (2007-09), por luajti vetëm 8 ndeshje me kuqeblutë dhe shënoi vetëm një gol.
Ai e mbylli karrierën në vitin 2013 te IFK Rosjoholm.
