Reperi i njohur shqiptar, Noizy, i ftuar në “Pushime On Top”, foli për koncertin e tij i titulluar “Alpha Show” i cili do të mbahet më 14 gusht në Tiranë.
Më herët është përfolur se pas koncertit madhështor që reperi do të realizojë në kryeqytet do të largohet nga muzika. E pyetur nga Ori Nebijaj, Noizy e ka mohuar duke sqaruar se si qëndron e vërteta.
“Besoj se jam disa vite larg largimit nga muzika. Nuk besoj se do e le muzikën ndonjëherë. Gjithmonë do të merrem me muzikë. Nëse s’do jem aktiv nëpër koncerte, do jem aktiv duke prodhuar muzikë për artista të rinj. Do bëj këngë, por mbase koncertet i rralloj. Kur të vijë mosha 50 vjeç normal që edhe mund të shkëputem”, tha Noizy.
Po çfarë do të bëjë Noizy pas koncertit? Ku do të arratiset?
Reperi tha se pas koncertit do të vazhdojë të punojë, këtë herë për një album të ri.
“Unë po përgatis një album tjetër. Albumi “Alpha” do dali 3 ditë para koncertit. Ndërkohë sapo të mbarojë koncerti do jem në 3 shtete në dy javë.”, është shprehur Noizy.
Reperi theksoi se ende nuk e ka vendosur emrin e albumit të ri për të cilin do të punojë sapo të mbarojë koncerti, por ama e ka të qartë se çfarë emri do t’i vendosi albumit të fundit të karrierës së tij.
“Albumi i fundit do të quhet “Ishte kënaqësi”, shtoi Noizy.
