Nga Boldnews.al
Aksidenti tragjik në plazhin e Potamit, ku mbeti e vdekur vogëlushja 7-vjeçare J. Avdia, konfirmoi dështimin total të strukturave shtetërore për ruajtjen dhe sigurinë e jetës dhe të shëndetit të qytetarëve në zonat bregdetare.
Qeveria dhe megafonët e saj publikë u munduan të relativizojnë ngjarjen.
Kryeministri Edi Rama foli për “vampirë” në radhët e medias dhe opozitës, që kritikojnë qeverinë, e cila sipas tij ka siguruar “sezonin më të mirë turistik”.
Ndërsa tellallët mediatike folën për “ngjarje që ndodhin në të gjithë botën”.
Por, tashmë ekziston edhe një dokument zyrtar, që, në mënyrë indirekte, dëshmon se institucionet publike kanë dështuar në mënyrën më skandaloze me Sigurinë në Plazhe.
Dhe ajo mban firmën e Drejtorit të Përgjithshëm të Policisë, Gledis Nano.
Kreu i Policisë konfirmon që nuk ekziston aspak bashkëpunimi ndërinstitucional për të ruajtur qetësinë në zonat turistike.
“Boldnews.al” ka në dispozicion një shkresë që Nano u ka dërguar këtë fundjavës disa institucioneve publike, pas ngjarjes tragjike të Potamit.
Në shkresë, Nano, duke pranuar se uniformat blu kanë përgjegjësinë kryesore për rendin dhe sigurinë e qytetarëve, ngre shqetësimin se strukturat e tjera publik nuk sjellin asnjë informacion për lejet dhe licensat që japin në zonat e Plazheve.
“Për të arritur rezultatet e duhura, policia e shtetit duhet të informohet periodikisht mbi masat e marra nga institucionet përgjegjëse, detyrim i cili nuk është respektuar në asnjë rast”, për lejet dhe licensat që jepen për Plazhe
Sipas Gledis Nanos, institucionet publike nuk kanë dorëzuar asnjë informacion në Policinë e Shtetit lidhur me “..licensimin për zhvillimin e aktivitetit dhe turizmit detar, pajisjen me leje drejtimi të mjeteve motorike, përcaktimin e zonave të ndaluara për lundrim dhe ankorim të mjeteve lundruese, si edhe çdo aktivitet tjetër që lidhet me hapësirën detare…”.
Pra, duket qartë që institucionet publike kanë një mungesë totale koordinimi, një qasje që natyrisht shton rrezikun për ngjarje tragjike, si ajo që u shënua në bregun e Potamit në fillim të këtij Gushti.
Shkresa e Nanos konfirmon nga ana tjetër edhe konstatimin e deklaruar më herët nga “Boldnews.al” se vdekja e dhimbshme e 7-vjeçare të familjes Avdia ngarkon me përgjegjësi të paktën gjysmën e qeverisë.
Në Vendimin e Këshillit të Ministrave nr.321, dt. 28 Maj 2014 “Për sigurinë në det, plazhe, në ujërat e brendshme..dhe gjatë ushtrimit të sporteve ujore”, përgjegjësia për dhënien e lejeve dhe kontrollin e vijës bregdetare u është ngarkuar një serie të gjatë institucionesh.
Dhe, siç rezultoi në rastin e Potamit, apo edhe të aksidenteve të ngjashme të evidentuara gjatë kësaj vere, të gjithë institucionet kanë dështuar në mënyrë kriminale.
VKM parashikon se përgjegjës për sigurinë në Plazhe janë: Ministria e Infrastrukturës, nëpërmjet Drejtorisë së Përgjithshme Detare; Ministria e Brendshme; Ministria e Mbrojtjes nëpërmjet Rojes Detare; Ministria e Turizmit; Ministria e Mjedisit dhe Njësitë e qeverisjes vendore.
Vendimi përkatës qeveritar u ngarkon këtyre institucione përgjegjësi konkrete për të siguruar mbarëvajtjen e sezonit turistik dhe mbi të gjithë, ruajtjen e jetës dhe shëndetit të pushuesve.
Por, në rastin e Potamit, të gjitha kanë dështuar në mënyrë më tragjike të mundshme.
