Tensionohet protesta që po zhvillohet te Ministria e e Brendshme, ndërsa policia nuk ka lejuar që qytetarët që të zhvendosen nga zona e pedonales te sheshi pas godinës qeveritare, atje ku dikur ndodhej Teatri Kombëtar.
Avokati Altin Goxhaj i ka kërkuar qytetarëve që të zhvendosen nga pedonalja te sheshi, ndërsa kordoni policor i vendosur paraprakisht ka ndërhyrë forcërisht duke ndaluar mbledhjen në shesh.
“Ne s´kemi armë, ne jemi qytetarë të lirë, që po protestojmë, ndaj të zhvendosemi disa metra më tej”, i bëri thirrje Goxhaj të pranishmëve në protestë, ndërsa në këtë moment ka ndërhyrë Policia, e cila e shumtë në numër ka rrethuar godinën e Ministrisë së Brendshme.
“Është e tmerrshme të shohësh gratë e pushtetarëve, që nuk e di si janë bërë nëna e dalin e thonë se kjo ngjarje ndodh në çdo vend të botës. Të zhduken nga jeta publike këto gra kriminele që nuk e di a janë nëna, ju po përdorni dhimbjen e fatkeqësitë e shqiptarëve.
Jeni vrasës, kriminelë, jepni dorëheqjen. Largohuni! Ministri i brendshëm në cdo vend të botës do ulte kokën e do merrte me vete zvarrë të gjithë kabinetin e tij.
Vajza ime 7-vjeçare kërkon drejtësi për Jonadën se mami nuk e lë më të dalë te bregu nga frika.”-tha një nga protestueset.
Policia e Krimit, poshtë Qeveria, janë disanga brohoritjet e protestuesve, ndërsa policia nuk ka lejuar mbledhjen e protestuesve në shesh.
“Çuçi, Çuçi jepe dorëheqjen! Dorëheqja është drejtësi”, ishin të tjera thirrje të protestuesve.
