Ministrja e Turizmit dhe Mjedisit, Mirela Kumbaro, ka reaguar për të parën herë mbi ngjarjen tragjike që ndodhi në Himarë mesditën e 2 gushtit, kur një vajzë 7-vjeçare u përplas për vdekje në bregun e detit, nga një skaf që drejtohej nga komisari i policisë, Arjan Tase.
“Tejet e rëndë dhimbja për ngjarjen e kobshme në bregdetin e Himarës, ku një engjëll nuk është më mes nesh për shkak të marrëzisë së një njeriu që theu çdo ligj, çdo rregull e çdo normë me pasoja tragjikisht të pakthyeshme!”, shprehet Kumbaro.
Ashtu si edhe Kryeministri Edi Rama, Kumbaro i drejtohet drejtësisë, e cila sipas saj duhet të veprojë pa asnjë kompromis, me dënim maksimal ndaj kujtdo që thyen ligjin dhe rregullat, duke rrezikuar jetët e të tjerëve.
“Kërkesa shkon edhe për Policinë e Shtetit po ashtu, për çdo punonjës të saj në territor, që të jetë në lartësinë vigjiluese dhe ndëshkuese që uniforma i imponon për kryerjen e detyrës”, shprehet Kumbaro.
Pas ngjarjes tragjike, në rrjetet sociale ka pasur një revoltë qytetare, ndërsa nesër do të mbahet një protestë ku do kërkohet largimi i ministrit të Brendshëm dhe asaj të Turizmit.
