Ish-Presidenti Ilir Meta, i cili sot drejton Partinë e Lirisë, ka reaguar përmes një postimi në rrjetet sociale, lidhur me ngjarjen e rëndë të ndodhur mesditën e sotme në Potam të Himarës, ku një vajzë 7-vjeçare u godit për vdekje nga një skaf që drejtohej nga komisari Arjan Tase.
“Thellësisht i tronditur nga ngjarja tragjike në plazhin e Himarës, ku zyrtari i lartë i Policisë së Elbasanit A.T i mori sot jetën një vajze të mitur 7-vjeçare, e cila kishte ardhur me familjen për pushime në Shqipëri.
Duke ju shprehur ngushëllimet më të ndjera familjes dhe të afërmve për humbjen e vogëlushes së tyre të shtrenjtë, dënoj me forcën më të madhe situatën katastrofike të sigurisë publike në plazhe, në pikun e sezonit turistik, fatkeqësisht me pasoja kaq tragjike të përsëritura.
Hetim i menjëhershëm i thelluar dhe ndëshkim të ashpër për shkeljen e ligjit nga drejtuesit e Policisë së Shtetit!
Mjaft arrogancës dhe papërgjegjshmërisë në Policinë e Shtetit”, shkruan Meta.
