Derisa Rusia po ballafaqohet me ikjen masive të qytetarëve si dhe sanksionet si pasojë e fillimit të pushtimit rus në Ukrainë, Moska ka menduar se përmes një video propaganduese do të arrijë të përmirësojë imazhin e këtij shteti.
Së fundmi përmes një video po tenton të dekurajoj imigrimin, duke e titulluar videon e re “koha për t’u vendosur në Rusi”, transmeton Telegrafi.
Videoja që për pak minuta është bërë objekt tallje në rrjetet sociale, shfaq kinse përparësitë që i ka ky vend për të jetuar.
Madje videon e kanë shpërndarë zyrtarë të ambasadës ruse në Spanjë, ku thuhet se Rusia mund t’i bëjë ballë mijëra sanksioneve.
Në anën tjetër realiteti në këtë vend është krejt ndryshe – atje mungon liria e shprehjes, mediat janë të kontrolluara nga Vladimir Putin, e ata që mendojnë ndryshe brenda natës “zhduken” pa gjurmë.
E kur flasim për humbje ky vend çdo ditë kthen në shtëpi mijëra ushtarë të vrarë, që kanë humbur jetën gjatë luftimeve të ashpra në Ukrainë.
Madje për të mbuluar këto humbje, Putini po tenton me çdo kusht që të mbajë sa më të fshehta të dhënat e sakta që tregojnë për numrin e madh të ushtarëve të vrarë.
Familjet e pasura ruse çdo ditë e më shumë po largohen nga ky vend, që është goditur rëndë nga sanksionet e vëna nga shtetet perëndimore.
Në video tentohet të reklamohet kinse “jeta e lirë”, ku energjia elektrike, uji, gazi e femrat e bukura e bëjnë këtë vend të “përkryer” për të jetuar.
