“Qeveria e Shqipërisë ka ndihmuar në Vuçiçizimin e Ballkanit”, u shpreh anëtarja e Kryesisë së PD, Edith Harxhi, ndërsa kërkoi nga Kryeministri Edi Rama të dënojë situatat provokuese serbe në Kosovë dhe retorikën “denazifikuese” të Vuçiçit dhe Putinit.
“Reciprociteti për Kosovën është shumë i rëndësishëm por i vonuar”, shkruan Harxhi në rrjetet sociale.
Sipas saj, fatkeqësia është që qeveria e Shqipërisë, këto vite ka ndihmuar në Vuçiçizimin e Ballkanit, pikërisht për të fshehur problemet e saj të brendëshme, por Vuçiçi nga ana tjetër është kthyer në levën e Putinit në Evropë.
“Me mbështetjen amerikane dhe ndërmjetësimin europian, pa përfshirjen e Shqipërisë paternaliste të Edi Ramës, dhe pa nismën famëkeqe të Ballkanit të Hapur, Kosova do të mund të shpëtojë nga një ndërhyrje dhe luftë që do na çonte të gjithëve në humnerë.
Për këto arsye, Edi Rama duhet të dënojë sa më parë çdo situatë provokuese serbe në Kosovë dhe retorikën “denazifikuese” të Vuçiçit dhe Putinit. Nëse nuk e bën, Shqipëria do vazhdojë të venitet si faktor në Ballkan dhe do të mbetet thjeshtë një republikë “bananesh nga Ekuadori” dhe një lodër e lobingjeve globaliste.
Deklarata e Ambasadorit Amerikan në Prishtinë flet më shumë se çdo deklaratë e ditës. Çdo vendim i institucioneve të Kosovës është bërë në konsultim me SHBA-në. Ambasadori Amerikan në Prishtinë, dënon dhunën dhe barikaduesit në veri të Kosovës”, shprehet Harxhi.
