Gushti kryesisht kthen në shtëpi shqiptarët që jetojnë e punojnë në vendet e BE, çka po po shënon shtim të lëvizjeve në pikat kufitare. Të pyetur në kufi, thonë se kanë dëgjuar për debatin e madh të rritjes së çmimeve, për të cilin ndajnë qëndrime të ndryshme.
Fluksi i lëvizjeve të gushtit nisi edhe përmes Pikës Kufitare të Kapshticës.
Shqiptarët që jetojnë e punojnë në Greqi po kthehen për disa ditë në shtëpi.
“Edhe për pushime, edhe për probleme. Kemi edhe dasma”
Ka nga ata që vijnë për të takuar prindërit ose për të marrë dhe nusen.
Rritja e çmimeve është fenomen botëror, por ka prej tyre që kur kanë bërë llogaritë thonë se u del më lirë të pushojnë në vendet turistike ku punojnë.
“Kur shikojmë nëpër internet, një hotel në Sarandë është më shtrenjtë se në zonën e Kalkidhikisë ku jetoj unë”
”Siç janë rritur në Greqi janë rritur dhe këtu” thotë një tjetër.
Rritet numri i personave që kanë hyrë në pikat kufitare
Rreth 8 mijë persona e kanë kaluar traun e doganës së Kapshticës në 24 orë.
Për të përballuar shtimin e lëvizjeve, punohet me 3 sportele në hyrje e 3 në dalje.
Prej fundjavës së fundit të korrikut, lëvizjet u shtuan në të gjitha pikat kufitare, tokësore, ajrore e detare.
Nga Kakavija, në Gjirokastër në 24 orët e fundit hynë 5159 udhëtarë ndërsa 3769 të tjerë dolën.
Shtim lëvizje ka edhe me Maqedoninë e Veriut.
Nga Qafë Thanë, hynë 3172 udhëtarë dhe 1880 të tjerë dolën.
Gushti nisi me fluks në rritje te emigranteve dhe turisteve nga deti.
4753 pasagjerë mbërritën me tragetet e Barit dhe Ankonës në Durrës, ndërsa 4614 të tjerë zbritën në Vlorë gjatë fundjavës.
