Fluks i lartë udhëtarësh në pikat e kalimit kufitar shqiptar. Nga raportimet mësohet se aeroporti i Rinasit dhe pika e Kakavijës kanë pasur edhe numrin më të lartë të udhëtarëve në orët e fundit.
Nga raportimet mësohet se nëpërmjet aeroportit të Rinasit, gjatë orëve të para të mëngjesit e deri pasditen e së shtunës, kanë hyrë 23.000 shtetas shqiptarë dhe të huaj. Në Rinas po punohet me sportele të shtuara dhe nuk ka probleme deri në këto momente.
Policia Kufitare e Kakavijës ka koordinuar veprimet me palën greke, e cila ka shtuar sportelet. Aktualisht në Kakavijë, nga pala greke punohet me 4 sportele dhe ka një numër shumë të vogël automjetesh që janë në pritje për përpunim.
Policia Kufitare në të gjitha pikat e kalimit në hyrje dhe në dalje, ka marrë masa duke shtuar sportelet në maksimum, si dhe vijon bashkëpunimi me homologët që lëvizja të jetë e njëtrajtshme si në hyrje, ashtu edhe në dalje, në të gjitha pikat e kalimit kufitar.
