Në shpalljen e vendimeve të qeverisë, ministri i Mbrojtjes u pyet edhe për çështjen e sulmit kibernetik në Shqipëri. Një nga gazetarët e pranishëm pyeti se kur do të jetë më e mundur një panoramë më e qarrtë e tij nga ekipi i ekspertëve. Më tej, gazetari shtoi se një faqe ueb e quajtur “Homeland Justice”, për të cilën dyshohet se i përket organizatës që ka kryer sulmin, ditën e diel do nxjerrë të dhëna të tjera.
Peleshi u shpreh: Te pyetja e dytë unë e gjej veten në kuptimin e sektorit për të cilin punoj sepse mbrojtja kibernetike është domain i mbrojtjes, domain i mbrojtjes kombëtare, jo në këtë rast sepse në rastin e sulmit të fundit kibernetik nuk kanë qenë të targetuara dhe nuk kanë arritur të depërtojnë ta themi tani kështu në sistemet tona të mbrojtjes. Meqenëse ra fjala, po i konfirmoj publikut të gjerë që asnjë nga sistemet tona të sigurisë dhe mbrojtjes, njësisë mbrojtëse dhe FA nuk është prekur dhe nuk ka ndaluar së punuari asnjë sekondë. Uebsajti dhe të gjithë sistemet tona janë në punë. E kundërta është e vërtetë, të gjithë e njohin. Unë nuk mund të zbardh detaje edhe sepse nuk lidhet me çështjen e fundit që po diskutohet dhe me mbledhjen e fundit të qeverisë, por dhe për shkak se është një punë në proces, këto janë probleme që ndodhin gjithandej. Jemi në kohën kur, unë e kam thënë dhe më parë, lufta apo mbrojtja kibernetike nuk është më domain i së ardhmes, është i së sotmes. Të gjitha vendet janë nën kërcënim.
