Nga Boldnews.al
Gjykata e Posaçme pritet të mbyllë këtë të Premte një proces penal ndaj Komisioneres së Vetingut, Etleda Çiftja, e akuzuar për deklarim të rremë të pasurisë dhe falsifikim dokumentash.
Procesi ndaj Çiftjas është interesant për dy arsye kryesore.
Ajo u përzgjodh në vitin 2017 si pjesë e “ajkës së juristëve” shqiptarë që do të verifikonin pasurinë e gjyqtarëve dhe prokurorëve e tashmë është nën akuzë për pasurinë e saj.
Po ashtu, i gjithë hetimi, por edhe shqyrtimi gjyqësor, po karakterizohet nga dyshimi i fortë se të gjithë strukturat e “Drejtësisë së Re” janë rreshtuar në krah të saj për ta shpëtuar nga sikleti penal.
Në seancën paraprake, të zhvilluar pak ditë më parë, gjyqtari Erion Bani pranoi kërkesën e komisioneres Çiftja për të vijuar me gjykim të shkurtuar.
Kjo do të thotë që Çiftja shmang përballjen me provat dhe faktet në gjykatë, duke kërkuar që shqyrtimi të kryhet vetëm mbi leximin e akteve të dosjes nga gjyqtari i çështjes.
Gjyqtari Bani, i shortuar për të shqyrtuar kërkesat paraprake të të pandehurës Çiftja, kishte kërkuar dorëheqjen nga rasti, nën dyshimet për konflikt interesi.
Gjyqtari, më herët, është konfirmuar në detyrë nga një trupë e procesit të Vetingut, ku relatore ishte pikërisht Etleda Çiftja.
Drejtuesja në detyrë e Gjykatës së Posaçme, Irena Gjoka, e rrëzoi kërkesën për dorëheqje.
Në bazë të Kodit të Procedurës Penale, në rastet e gjykimeve të shkurtuara, gjyqtari i hetimeve paraprake shndërrohet automakisht në gjyqtarin e themelit.
I njëjti Kod parashikon se Gjykata e Posaçme shqyrton çështjet në themel me trupa të përbëra nga tre gjyqtarë.
Nga ky rregull bëjnë përjashtim gjykimet e shkurtuara, të cilat shqyrtohen nga një gjyqtar i vetëm, i njëjti që ka pranuar më herët kërkesën e të pandehurit për këtë lloj gjykimi.
Në rastin konkret, vendimi për komisioneren e Vetingut do të merret nga gjyqtari Erjon Bani, i cili më herët ka marrë dritën jeshile për të vijuar karrierën nga Etleda Çiftja.
Më qartë nuk ka ku të shkojë. Përtej paragjykimeve, vendimi i gjyqtarit Bani nuk duket se do të sjellë ndonjë surprizë negative për Etleda Çiftjan.
Qëndrimi i saj sfidues para prokurores së çështjes dhe gazetarëve që ndoqën seancën paraprake, dëshmon se komisionerja Çiftja duket e garantuar në “pafajësinë” e saj.
Ka një mori detajesh të tjera, të cilat mund t’i krijojnë Çiftjas idenë e paprekshmërisë.
Hetimi penal ndaj saj u zhvillua për një kohë të gjatë dhe rrezikonte të mbyllej me tejkalim të afateve të parashkrimit.
Vetëm presioni mediatik “nxiti” prokurorët e posaçëm që të mbyllnin hetimin dhe ta merrnin të pandehur Etleda Çiftjan, pasi provat dhe faktet ishin të tilla që nuk mund të mbyllje sytë.
Megjithëse mori statusin “e të pandehurës”, komisionerja Çiftja vijoi e pashqetësuar detyrën e saj.
Ajo vijon të verifikojë pasurinë e gjyqtarëve dhe prokurorëve, ndërkohë që vetë akuzohet zyrtarisht për veprat penale të deklarimit të rremë të pasurisë dhe falsifikimit të dokumentave.
Asnjë nga institucionet e reja të drejtësisë, të ngarkuara me inicimin e procedimit disiplinor, përfshirë edhe Operacionin Ndërkombëtar të Monitorimit, nuk kanë bërë asnjë lëvizje më të vogël për pezullimin e Etleda Çiftjas.
Duket se të gjithë në “Drejtësinë e Re” kanë një qëllim-të shpëtojnë “ushtaren Çiftja”!
