Zbulohet emri i personit me inicialet I.M, që përmendet në dokumentet e Autoritetit të Dosjeve si ish bashkëpunëtor i Sigurimit të Shtetit.
Sipas ABC, ky person nuk ka asnjë lidhje me ish-presidentin Ilir Meta, pas aludimeve në media të emrit të tij si i rekrutuar nga ish-sigurimi në diktaturë.
Mësohet se personi I.M me anë të një letre zyrtare i ka kërkuar informacion institucionit të Autoritetit të Dosjeve, të drejtuar nga Genta Sula, për të marrë informacion se çfarë ka shkruar ish-sigurimi për personin e tij, pasi dyshonte se gjatë viteve të fundit të diktaturës ka qenë i përndjekur nga agjentët e spiunazhit shqiptar.
Personi në fjalë, që i ka kërkuar Autoritetit të Dosjes informacion mbi dosjen e tij është Imigron Muçaj, në këtë rast nuk ka asnjë lidhje me emrin e ish-Presidentit.
Qytetari në fjalë ka kërkuar informacione mbi përndjekjen që i është bërë nga Sigurimi i Shtetit, ndërsa ajo që është interpretuar më pas me inicialet e tij, duke i lidhur me ish-Presidentin, duken një tjetër çështje, e cila nuk dihet se si mund të jetë ngatërruar, ndoshta edhe qëllimisht.
E nëse qytetari në fjalë ka kërkuar informacione nëse Sigurimi e ka përndjekur, debati që u hap nga Autoriteti i Dosjeve, mbi politkanin e lartë I.M është krejt tjetër, pasi autoriteti në reagimin e tij, fliste për një bashkëpunëtor.
Pra nëse qytetari që ka kërkuar informacion ishte “viktimë” e përndjekjes nga Sigurimi, ajo çka ka ngritur Autoriteti i Dosjeve është përcaktimi si bashkëpunëtor i Sigurimit të politikanit I.M.
Ditën e djeshme Autoriteti i Dosjeve me anë të një letre i është drejtuar Kuvendit duke propozuar ndryshime ligjore për verifikime të rasteve te ngjashme.
Prandaj ditën e sotme Kryetarja e Kuvendit Lindita Nikolla thirri me urgjencë krerët e grupeve parlamentare, për t’i njohur me dosjen që ekziston në emër të politikanit I.M.
