Dorian Keqi është arrestuar nga policia për vrasjen e ish-shefit të OSHEE-së Saimir Jaku dhe plagosjen e Gjergj Prengës, krim i ndodhur më 9 shtator 2016, në Rrëshen.
Kreu i Policisë së Lezhës Vehbi Bushati, në konferencë për shtyp, bëri me dije se 40-vjeçari Keqi, lindur në Kurbin dhe banues në Krujë, veproi në rolin e vrasësit me pagesë për llogari të një grupi kriminal që operon në Lezhë.
Pjesëtarët e grupit, shtoi ai, janë identifikuar dhe janë nën hetim.
Ngjarja e rëndë ndodhi rreth 6 vjet më parë në një lokal në qytetin e Rrëshenit ku Jaku u sulmua me armë zjarri nga dy persona. Nga të shtënat mbeti i plagosur edhe personi tjetër që ndodhej në tavolinë me të.
Vrasje dyshohet se ndodhi në vazhdën e një serie krimesh për hakmarrje mes dy fiseve.
Hetimet
Hetimet që çuan në operacionin e koduar “Gjurma” u zhvilluan nga policia dhe prokuroria e Lezhës, në bashkëpunim me Institutin e Policisë Shkencore.
Prokuroria kërkoi arrest me burg në gjykatën e rrethit për Keqin, për veprat penale “Vrasja në rrethana të tjera cilësuese”, kryer në bashkëpunim dhe “Prodhimi dhe mbajtja pa leje e armëve luftarake e municionit”. Masa u konfirmua nga gjykata dhe u ekuzuatua nga policia.
“Ky shtetas, në bashkëpunim me shtetas të tjerë, dyshohet se e ka kryer krimin e vrasjes së shtetasit Saimir Jaku, kundrejt pagesës. Porositësit e vrasjes dyshohet të jenë një grup i strukturuar kriminal që vepron në qarkun Lezhë, tashmë të identifikuar dhe nën hetim nga ana e Policisë. Për shkak të cilësisë së hetimit dhe të ruajtjes së sekretit hetimor, nuk mund të bëjmë publike të dhëna të tjera për këtë çështje”, u shpreh Drejtori i Policisë së Lezhës.
Gjatë kontrollit të ushtruar në banesën e të ndaluarit janë gjetur dhe sekuestruar në cilësinë e provës materiale 21 aparate celulare dhe 6 mbajtëse të kartave SIM.
“Vazhdojnë hetimet për dokumentimin e plotë e ligjor të kësaj ngjarjeje”, shtoi Vehbi Bushati.
Si u zbulua autori
Sipas burimeve pranë grupit hetimor, Dorian Keqi u zbulua nga gjurmët e gishtave që kishte lënë në vendin e ngjarjes.
Pas vrasjes së Saimir Jakut, në fshatin Skuraj u gjet një automjet, i cili dyshohet se ishte përdorur nga autorët e krimit dhe pranë makinës u zbulua bidoni i benzinës. Pikërisht në bidonin e benzinës, u gjet një gjurmë gishti, që u zbulua se përket Keqit.
Arrestimi, killeri i dehur në timon
Arrestimi i të cilësuarit si vrasës me pagesë erdhi pasi efektivët e policisë rrugorë kanë konstatuar në Lezhë një automjet i cili lëviztë në mënyrë të dyshimtë.
Pas kontrollit, policia ka konstatuar se brenda mjetit lëvizte Dorjan Keqi, por pa arritur të identifikonin si vrasës me pagesë.
Pasi është kryer testi i alkoolit, ka rezultuar në gjëndje të dehur dhe me pas është kryer arrestimi i tij për veprën penale të dhënies së automjetit në gjëndjë të dehur, por ndërkohë kanë ardhur edhe përgjigjet e gjurmëve të gishtërinjve të 40 vjeçarit nga Kruja.
Sipas analizave daltiloakopike, ka rezultuar se personi i ndaluar për drejtim mjeti në gjëndje të dehur ishte vrasësi i Sajmir Jakut dhe autori i plagosjes së Gjergji Prengës në vitin 2016 në Rrëshen.
