Gjykata e Posaçme refuzon kërkesën e ish-drejtuesit të policisë Leonard Palushit i arrestuar gjatë operacionit “Plumbi i Artë”.
Palushi kërkoi masën “arrest shtëpie” për arsye familjare pasi njeri nga fëmijët e tij do të kryente një operacion, por gjykata refuzoi ndryshimin e masës.
Ai akuzohet nga SPAK për orientim të gabuar të hetimit duke shpërdoruar detyrën për vrasjen e Emiljano Ramazanit. Sipas hetimeve, oficeri u kontaktua për armën e vrasjes së Ramazanit nga një person i panjohur dhe pas deklaratës së tij, 2 persona të pafajshëm u arrestuan nga policia, në mënyrë që çështja të mbyllej dhe krimi të mbulohej.
“Kam bërë vetëm detyrën, ndoshta pak më tepër nga sa duhet. I kërkoj autoriteteve të marrin në mbrojtje familjen time. Kam një jetë që kam vënë veten në rrezik në operacione të ndryshme përfshirë goditjen e kultivimit të drogës apo arrestime të personave të rrezikshëm. Kam dy fëmijë të mitur të cilëve iu duhet siguruar jeta. Kam zbatuar me përpikmëri rregullat e policisë. Kam mbajtur prej dy vitesh qëndrimet e mia për ngjarjen, pasi jam pyetur rreth saj. Nuk kam asnjë lidhje me grupe kriminale apo persona të tillë. Kontaktet me Erion Alibej për shkak se i kishin vrarë të vëllain, Endrit Alibej bashkë me xhaxhain e tij dhe një shtetas turk. Takimet me të kanë ndodhur vetëm në këtë kontekst, të marrjes në pyetje dhe informacioneve që mund të dinte”, ka deklaruar më herët Palushi para togave të zeza.
Në sajë të operacionit “Plumbi i Artë” – që erdhi pas dëshmisë së Nuredin Dumanit – u lëshuan 32 masa sigurie, ku 9 prej tyre u ekzekutuan në burgje, 9 persona u arrestuan ndërsa 14 persona u shpallën në kërkim.
