Robert Lewandowski ka bërë një lëvizje të bujshme gjatë kësaj vere teksa i dha lamtumirën Bajern Mynih për t’iu bashkuar Barcelonës. Një lëvizje me shpresën që të ndihmojë këtë klub të kthehet në maja, pas viteve ku ka bërë shumë më keq se sa pritet nga një klub i tillë.
Një “dorë” për këtë situatë ia ka dhënë edhe vetë Levandovski në vitet te Bajerni, duke qenë protagonist në një nga humbjet më të bujshme të historisë së katalanasve, atë disfatë 2-8 në Ligën e Kampioneve ku edhe vetë polaku ishte protagonist me një gol për ekipin bavarez. Në konferencën e sotme për shtyp, Levandovski është ngacmuar nga gazetarët nëse ka folur me shokët e rinj të skuadrës për atë sfidë dhe polaku nuk e ka mbajtur dot të qeshurën.
“Më duhet të them se nuk kemi folur rreth kësaj teme”, tha duke qeshur polaku. “Pasi siç e kam thënë, kjo është e kaluara dhe tani është një kapitull i ri, kemi të ardhmen përpara nesh. Gjëja më e mirë është të mos shohim mbrapa, kjo është ideja dhje objektivi ynë”, tha Levandovski para gazetarëve.
