Të shtëna me armë zjarri në zonën e Ujit të Ftohtë në Vlorë. Ngjarja ka ndodhur mesditën e sotme, ndërsa nuk raportohet për lëndime në njerëz.
Nga të dhënat e para mësohet se pas një konflikti, një person ka qëlluar me armë zjarri në ajër. Konflikti ka ndodhur për shkak të parkimit të një makine.
Policia ka shkuar në vendin e ngjarjes por pa mundur të kapë personin që ka qëlluar, i cili është larguar me shpejtësi.
Vlorë/Informacion paraprak
Sot, rreth orës 12:00, në afërsi të tunelit në “Uji të Ftohtë”, si pasojë e një konflikti të çastit për motive të dobëta, dyshohet se një shtetas, ka qëlluar me armë zjarri në ajër.
Nga verifikimet e bëra nga shërbimet e Policisë, nuk ka persona të dëmtuar.
Janë ngritur pika kontrolli dhe vijon krehja e zonës për kapjen e autorit i cili është identifikuar nga Policia menjëherë.
Grupi hetimor ndodhet në vendngjarje dhe po punon për zbardhjen e plotë të rrethanave të ngjarjes dhe identifikimin e personave të përfshirë në konflikt.
