Dy finlandezë të shpallur në kërkim ndërkombëtar janë arrestuar nga policia në Lezhë.
Aksioni policor i koduar “Manhunt” u zhvillua nga njësia Fast Albania, në bashkëpunim me FAST Finlandë, Interpolin e të dy vendeve dhe DVP Lezhë.
Në Shëngjin të Lezhës u arrestuan K.U., 30 vjeçe, dhe L.H., 32 vjeç, të dy banues në Finlandë.
Ata janë shpallur në kërkim ndërkombëtar nga autoritetet e vendit të tyre për veprën penale “Trafikimi i lëndëve narkotike të forta dhe sintetike”.
“Interpol Tirana, në bashkëpunim me autoritetet ligjzbatuese finlandeze, vijon punën për ekstradimin e këtyre shtetasve drejt Finlandës”, njofton policia.
