Milan Skriniar nuk është më në merkato, kështu raportojnë mediet italiane në orët e fundit.
Inter ka tërhequr nga tregu mbrojtësin sllovak, i cili ishte në “orbitën” e PSG, me “zikaltërit” të cilët po mendojnë rinovimin pasi humbën garën me Juventus për shërbimet e Gleison Bremer nga Torino.
Skriniar pritet që tashmë të nis bisedimet me drejtuesit e nënkampionëve të Italisë, për të diskutuar termat e kontratës së re.
Gjithsesi nga Franca, raportojnë se PSG nuk ka humbur akoma shpresat dhe kjo për faktin se kontrata aktuale e 27-vjeçarit skadon në qershorin e vitit të ardhshëm.
Inter tashmë po mendon për një kontratë të re dhe pritet me interes për t’u parë se çfarë do të përmbajë kontrata e re, pasi në Paris, Skriniar ishte informuar se do të përfitonte një shumë të lartë dhe tani në vetvete, Inter duhet të mirë mendojë ofertën për sllovakun.
Milan Skriniar është pjesë e Inter nga vera e vitit 2017 dhe kampionët e Francës ishin bërë gati për të investuar plotë 80 milionë euro për kartonin e tij dhe tashmë e ardhmja e qendërmbrojtësit mbetet enigmë.
