Pa përfundimit të ndeshjes mes Tiranës dhe Zrinjskit në “Air Albania” ka përfunduar në përleshje mes tifozëve të huaj dhe policisë shqiptare.
Në pamjet e publikuara nga BalkanWeb, duken efektet e përleshjes me karrige dhe sende të shpërndara në terren, ndërsa policia ka nisur shoqërimin e disa prej tifozëve.
Përplasjet mes tifozëve boshnjakë dhe atyre të Tiranës, dhe më pas me policinë kanë ndodhur pas ndeshjes, ndërsa janë hedhur shishe dhe mjete qelqi të marra nga lokale jashtë stadiumit.
Nga ajo që raportohet është se tifozët boshnjakë, në pjesën më të madhe të tyre, kanë qenë në gjendje të dehur, ndërsa situata ka precipituar në akte dhune për disa minuta.
Policia ka shoqëruar 25 persona lidhur me incidentet e dhunshme që kanë ndodhur, ndërsa raportohet për dy persona të plagosur, nga fishekzjarret ose mjete të forta. Gjithashtu raportohet se edhe një efektiv policie ka mbetur i plagosur, ndërsa më herët u tha se ka pasur krisma armësh dhe shpërthime kapsollash.
Policia ka përdorur edhe gazin lotsjellësh kundër tifozëve. Nga raportimet mësohet se 3 persona, dy punonjës policie dhe 1 tifoz janë transportuar me ambulanca drejt qendrave spitalore për mjekim të specializuar.
