Partizani u eleminua nga Conference League pas penalltive me Saburtalo. Tanimë të kuqtë janë duke menduar për afrimet e reja dhe garën në Superligë. Me sezonin e ri që do edhe një muaj të nisë, fokusi i të kuqve duket se qëndron në sulm.
Demat kanë pikasur sulmuesin vlonjat që luan për Virtus Entela në Serinë C të Italisë. Bëhet fjalë për Silvio Merkaj. 24 vjeçari sezonin e fundit ishte ndër më të mirët te të tijtë, duke zgjuar interesin e disa klubeve.
Me kontratë deri në 2024 me italianët, Partizani e kërkon lojtarin në huazim pasi kartoni i tij vlen 400 mijë euro. Shtypi i shkruar njofton se të kuqtë nuk janë stepur nga vlera e lartë, duke kërkuar të tjera metoda për ta pasur lojtarin sezonin e ri.
Ende asgjë konkrete, me palët që janë në negociata. Në 27 ndeshje sezonin e shkuar si titullar, Merkaj shënoi 14 gola dhe dhuroi 7 pasime për gol.
