Të tjera detaje janë mësuar për atentatin e ndodhur në Fushë-Krujë gjatë mesditës së sotme.
Brilant Martinaj dhe Diklent Vata kanë lidhje gjaku. Ndërsa, Besmir Hoxha ishte një mik i tyre. Grupi hetimor pas analizimit të vendit të ngjarjes, dhe mbledhjes të të gjitha provave, ka dalë në përfundim se autorët i kanë mbajtur në vëzhgim viktimat, duke studiuar lëvizjet.
Ka dyshime se 6 persona mund të kenë marrë pjesë në atentat, që përfundoi në masakër. Hetuesit kanë dalë në përfundimin se tre nga autorët kanë pasur rolin e qitësve, kurse njëri ka ngarë automjetin. Një person i pestë ka vënë në dijeni autorët për lëvizjet e viktimave.
Kurse një person i gjashtë dyshohet se ka marrë përsipër që të largojë autorët nga fshati Larushkë, ku është djegur makina me të cilën është kryer krimi i rëndë.
Automjeti me të cilën është kryer ngjarja dyshohet se ka qenë e vjedhur në Tiranë. Ndërkohë, në të janë gjetur edhe tre armët e krimit që u qëlluan viktimat, dy kallashnikovë dhe një automatik tip MP5.
Armët janë dërguar në laborator, me shpresën që të gjendet ndonjë provë. Por, kjo gjë duket e vështirë, sepse armët janë shkrumbuar.
Viktimat kanë qenë duke ecur në rrugën nga Tirana për në Kurbin. Edhe vendi ku ka ndodhur ngjarja ka dyshime se është mirëmenduar nga autorët, që të mund të ikin më lehtë nga aty pa u zbuluar.
Autorët duket se kanë dashur të vrasin të tre personat, që të mos lënë dëshmitar në vendngjarje. Diklent Vata ka arritur të dalë gjallë nga automjeti, edhe pse plagosur, por se është qëlluar nga afër me armë.
Pas kësaj, autorët kanë djegur edhe makinën e viktimave. Kështu, ata kanë shkrumbuar dy viktimat Brilant Martinaj dhe Besmir Hoxhën.
