Rikthehen dyshimet për trukimin e ndeshjeve në futbollin shqiptar. Në raportin e vitit 2022 të publikuar nga Shoqata Ndërkombëtare e Integritetit të Basteve (IBIA), figurojnë 88 evente sportive, rezultati i të cilave ka dyshime të forta se është manipuluar.
Mes tyre bëhet fjalë edhe për një ndeshje të futbollit shqiptar. Megjithatë, në raport nuk ka specifikime për çfarë ndeshje: nëse ajo lidhet me aktivitetet kombëtare apo ndërkombëtare, nëse është në nivel klubesh apo përfaqësuesesh, e për më tepër nëse bëhet fjalë për futbollin e meshkujve apo atë të femrave.
Akuza për trukim në Shqipëri është mes 46 eventeve sportive të dyshuara në Europë, ku pjesa më e madhe lidhen me futbollin, por të përfshira janë edhe sporte si tenisi, ping-pongu, basketbolli dhe garat me kuaj e me qen.
18 evente janë të dyshuara si të manipuluara në Azi, 5 në Afrikë, 13 në Amerikën e Veriut dhe 2 në Amerikën e Jugut. IBIA analizonte se 88 eventet që ndodhen në bankën e të akuzuarve për trukime, janë regjistruar në 8 disiplina të ndryshme sportive, të shpërndara në 36 vende të botës.
Futbolli me 32 ndeshje, tenisi me 27 dhe garat me kuaj me 12 sinjalizime, dominojnë pasi përbëjnë 81% të dyshimeve për paracaktim të rezultatit, me qëllim përfitimin e paligjshëm nga bastet.
Sipas Shoqatës Ndërkombëtare të Integritetit të Basteve, ndeshjet e dyshuara, duke përfshirë edhe atë të futbollit shqiptar, i janë raportuar autoriteteve përkatëse për hetime të mëtejshme.
