Avokatët e Shqipërisë kanë nisur sërish protestë kundër hartës së re gjyqësore.
Kryetari i Dhomës së Avokatëve, Maks Haxhia dhe koleget e tij kanë protestuar ditën e sotme para Këshillit të Lartë të Gjyqësorit, për të kundërshtuar hartën e re gjyqësore.
Një ditë më parë, Maks Haxhia ka shprehur kundërshtitë në Komisionin e Ligjeve kundër Hartës së re Gjyqësore, ndërkohë që ditën e sotme ai ka bërë të ditur se ky draft nëse miratohet do të dërgohet për t’u goditur në Gjykatën Kushtetuese.
“Patjetër që do e çojmë në Gjykatën Kushtetuese. Ne jemi juristë, ajo është hapi i fundit që do ndërmarrim”, tha Haxhia.
Kreu i Dhomës së Avokatëve foli dhe për ndëshkimin e disa prej avokatëve që thyen vendimin për bojkotin. Ai u shpreh se: “Ne kemi një kuadër ligjor, statutin e avokatit dhe ju siguroj që çdo hap që ne kemi hedhur është komform ligjit për statusin e avokatit”.
Më tej Haxhia tha se: “Pavarësisht se ja kemi bërë të qartë në Komisionin e Ligjeve, çdo përpjekje për të kufizuar ushtrimin e profesionit të avokatit është e dështuar, pasi vendimi i Gjykatës Kushtetuese ka betonuar se profesioni i avokatit nuk mund të kufizohet nga institucionet gjyqësore apo të drejtësisë”.
Avokatë nga të gjitha rrethet e vendit kanë protestuar kundër hartës së re gjyqësore, duke thënë se nuk iu shërben aspak qytetarëve dhe se është formë e gabuar e ndarjes së gjykatave.
