Një shqiptar në kërkim ndërkombëtar që prej vitit 2000 është arrestuar në Itali, raportuan këtë të Mërkurë mediat vendase.
Bëhet fjalë për 40-vjeçarin Besnik Lamçja, i cili është dënuar me 25 vite heqje lirie nën akuzën e vrasjes gjatë një grabitje të një personi në Tiranë.
Sipas të dhënave policore: Në datën 27 qershor 2000, në vendin e quajtur “Magazinat e tregtisë”, në rrugën “Siri Kodra”, Besnik Lamçja, në bashkëpunim me shtetasin E.Ç., ka vrarë me armë zjarri shtetasin G.U..
Besnik Lamçja është dënuar me 25 vjet burgim, nga Gjykata e Rrethit Gjyqësor Tiranë, për veprat penale “Vrasja me paramendim, kryer në bashkëpunim” dhe “Vjedhja me armë”.
Mediat italiane raportojnë se i arrestuari fshihej në shtetin fqinjë me identitet të rreme. Ai është arrestuar pas hetimeve të autoriteteve italiane, në bashkëpunim me ato shqiptare, dhe pritet ekstradimi i tij drejt Shqipërisë për vuajtjen e dënimit.
