Në mbledhjen e komisionit të Ligjeve të mbajtur ditën e sotme për hartën e re gjyqësore, ka pasur debate të shumta mes edhe mes deputetit të PD, Enkelejd Alibeaj dhe kryetares së Këshillit të Lartë Gjyqësore, Naureda Llagami.
Duke u referuar shpenzimeve që do u shtoheshin qytetarëve me hartën e re gjyqësore, Alibeaj iu drejua me pyetje Llagamit duke marrë si shembull edhe një rast konkret të një qytetari nga Puka, sa i takon kostove të shtuara financiare.
Llagami u përgjigj se institucioni që ajo drejtonte nuk merrej me problemin e kostove financiare por shtoi se do të ngrihej një zyrë e ndihmës juridike.
DEBATI
Alibeaj: Një qytetari që shkon në gjykatën e Pukës, shkon të zgjidhë konfliktin e vet, sot harxhon X lekë. Nesër me hartën e re, do niset nga Puka calë calë, do shkojë në Shkodër, do marrë një avokat të shtrenjtë, po do hajë, do flejë…Kjo është llogari që nuk ka të bëjë me buxhetin familjar, por me aksesin në drejtësi. Nëse është një shumë e papërballueshme, nuk do bëjë padi, por do marrë pushkën për të bërë drejtësi.
Llagami: 15 qytetarë janë sot në Pukë dhe KLGJ nuk ka pse të bëjë sot analizë, sepse kjo është detyrë e ekzeëkutivit. Ajo që duhet të bëjmë ne, jemi tek aksesi në drejtësi. Tek gjykata e Pukës do të hapet një zyrë e ndihmës juridike.
Bushka: Nuk mund ta ndërprisni kur zonja flet. Pyetjet i bëtë.
Alibeaj: E ka për detyrim të përgjigjet
Bushka: Jo për gjithë hënë dhe yjet që bëni ju këtu
Alibeaj: Kur thashë një qytetar të Pukës, është vetëm për një. Më llogarit të gjithë qytetarët e nën gjykatave që do të harxhojnë lekët.
Llagami: KLGJ nuk merret me kostot familjare. Palët do kenë avokat, do ofrohen shpenzime sipas ligjit.
