Anëtari i Këshillit Kombëtar të PD, Dorian Teliti, u shpreh në emisionin ‘Task Force’ në Syri Tv se situata aktuale në vend nuk është aspak pozitive, ndërsa theksoi se shumë shqiptarë janë në rrezik për shkak të varfërisë ekstreme.
“Nuk është vetëm zëri i opozitës që flet, por dhe raportet ndërkombëtare, si ai i OKB-së sot për të gjithë botën, që këto muaj dhe në të ardhmen rrezikohet rritja e varfërisë në vendet e dobëta, si Shqipëria. Janë 100 mijë shqiptarë që mund të futen në shtresën e varfër, konsum 5.5 dollarë në ditë.”-tha Teliti.
Teliti deklaroi se qeveria e Ramës ka braktisur bizneset duke mos i mbështetur ndërsa tha se paratë e qytetarëve shkojnë në duart e një grushti njerëzish.
“30 mijë lekëshi i famshëm për disa pensionistë, u hoq. Asgjë s’ka ndryshuar. Konstatohet se kriza në Shqipëria vijon të thellohet. Shqiptarët kanë paguar 30 mln euro më shumë për ushqime këtë qershor.”-deklaroi Teliti.
Sakaq, Teliti deklaroi se një pjesë e konsiderueshme e familjeve shqiptare do përballen dhe me krizën e punësimit.
“Edhe bizneset kanë frikën e zgjerimit. Qeveria duhet të lehtësojë bizneset, nuk janë lopë për tu mjelë, por për t’i dhënë ekonomisë një mundësi të ecë përpara, edhe biznesi fiton, por edhe shteti. Pa biznese që nuk prodhojnë, nuk sjell asgjë.”-tha Teliti.
