Administrata Tatimore ka rikujtuar tatimpaguesit e biznesit të vogël pa TVSH, të pafiskalizuar brenda 30 qershorit të fiskalizohen, pasi nga 1 korriku bizneset, që nuk janë fiskalizuar do të përballen me penalitetet, që rrjedhin nga zbatimi i legjislacionit tatimor në fuqi.
“Rikujtojmë tatimpaguesit e biznesit të vogël pa TVSH, që nuk e kanë nisur ende procesin e fiskalizimit, të fiskalizohen për të vijuar ushtrimin e aktivitetet të tyre në përputhje me ligjin në fuqi, sipas të cilit asnjë biznes nuk mund të ushtrojë aktivitet nëse nuk lëshon fatura të fiskalizuara përndryshe do të gjobitet deri në mbyllje të aktivitetit”, sqaron Administrata Tatimore.
Deri tani janë 108 mijë biznese që kanë implementuar fiskalizimin dhe 4500 të tjerë ndodhen në proces të nxjerrjes të certifikatës elektronike.
Detyrimin për të përdorur sistemin e fiskalizimit e kanë të gjithë bizneset që kryejnë transaksione me para në dorë, pavarësisht nëse nuk janë të regjistruar në përgjegjësinë tatimore me TVSH.
Fiskalizimi nisi të zbatohet në janar të vitit të shkuar për kompanitë që presin fatura për institucionet shtetërore, ndërsa në shtator zbatimi i tij u zgjerua edhe për bizneset që shesin për konsumatorët, por qeveria shtyu vendosjen e gjobave deri më 1 korrik të këtij viti.
