Nga Boldnews.al
Kryeministri Edi Rama bëri çudi me të tijët kur nuk u besonte syve se INSTAT (Instrituti i Statistikave) publikoi të dhënat se numri i lopëve dhe bagëtive të imëta ishte gati përgjysmuar krahasuar edhe me tre vjet më parë. Po Rama si mjeshtër në llogari, të cilat i ka “studiuar” që në klasën e katërt, pasi më pas pikturë dhe arte të tjera ka mësuar, bëri një pyetje ekzisdenciale. Po përse thoni janë pakësuar lopët, delet dhe dhitë ku vendi plotëson nevojat për qumëshut në 97 për qind?
Në fakt, qumështi vjen me shumicë nga Serbia, duke përfituar fort edhe nga nisma e Ballkanit të Hapur dhe fermerët serb kanë gjetur treg të mirë në Shqipëri, pasi me subvencionet që kanë në shtetin e tyre iu leverdis që ta tregtojnë këtu tek ne, madje me çmim konkurues. Por ka edhe fakte të tjera. Disa ferma që janë në kushtet e mbijetesës dhe dita-ditës po pakësohen e marrin ushqimin për bagëtitë në dy vendet ballkanike, barin nga Maqedonia e Veriut, ndërsa misrin dhe koncentratën tjetër nga Serbia.
Një koli njonxhë vjen shumë më lirë nga Maqedonia e Veriut sesa prodhohet këtu në vend. Rritja e çmimit të naftës, të plehrave kimikë, mungesa e ujit vaditës dhe kosto e lartë për çdo shërbim tjetër ka bërë që fermerët ta blejnë në vendin fqinj barin, pasi për ta prodhuar në vend ka shpenzime shumë më të larta.
Kjo do jetë çudia më e madhe për kryeministrin, kur të mësojë se bari vinka nga Maqedonia e Veriut. “Si nuk paska barë vendi”-do ngrejë pyetjen me të drejtë numri një i vendit tonë. Në fakt barë kemi, madje me shumicë, sa vendet fqinje çdo kohë kapin tonelata hashash që prodhohet në vend, ku me përkedheli i themi edhe “bari çudibërës”.
Po me të ne konkurrojmë këdo, madje dolëm të shtatë në botë për prodhim dhe trafikim të hashashit. Një arritje që nuk duhet mohuar dhe e gjithë merita shkon së pari për Policinë e Shtetit dhe sigurisht edhe për qeverinë shqiptare që ka mundur të “subvencionojë” grupet kriminale, duke i lejuar që të bredhin lirshëm në oazin e trafiqeve.
Po a mbarështohen lopët dhe bagëtitë e imëta me “barin e qejfit” që prodhohet bollshëm tek ne? Këtë përgjigje e jep vetë shkenca, që kafshët që prodhojnë qumësht dhe mish, as erën nuk ia durojnë, jo më ta konsumojnë.
Kushdo që e prodhon barin hashash ia sheh të mirat pasi ka për të gjithë, paçka se një pjesë fitimi të paktën një herë në dy vite shkon për “taksën e votimeve” për t’i dhënë ymër edhe më shumë pushtetit. Po me ato të ardhura sigurojnë edhe poste të larta, drejtorë drejtorishë, kryetarë bashkishë e madje edhe deputetë. Ja pra që barë ka, nuk hahet, por pihet, duke sjellë edhe haluçinacionin e propagandës se vërtetë këtu mungojnë lopët, delet dhe dhitë, por qumësht pluhur apo natyral e kemi të bollshëm, lumë vjen nga Serbia… Sa për barin… Prisni drapërin e parë në fillim të shtatorit. Hambarët plot do jenë, nga Malësia e Dukagjinit në Lumin e Vlorës!
