Nga Boldnews.al
E moshuara 90-vjeçare, Haxhire Gurakuqi, u gjend e bezdisur këtë fillim-korriku dhe jeta e saj e qetë në Shtëpinë e të Moshuarve në Tiranë ndryshoi rrjedhën në mënyrë dramatike.
Kryetarja e Lëvizjes Socialiste për Integrim, Monika Kryemadhi, publikoi disa dokumenta zyrtarë, në bazë të të cilave Haxhirja e ngratë rezultonte të ishte një prej përfitueseve më të mëdha nga skema abuzive e inceneratorëve.
Zonja Gurakuqi as e ka idenë se çfarë ka ndodhur me emrin dhe dokumentat e saj. I vetmi shqetësim që ka është që të takohet sërish me djalin e saj, i cili, siç la të kuptohej në intervistat mediatike, e ka braktisur në Azil.
Djali i saj, Ardian Gurakuqi, ka disa kusure me drejtësinë dhe ndoshta nuk ka pasur kohë për nënën e tij.
Por, problemi i saj më i madh tashmë është se kush e ka përfshirë në skemën gjigande financiare, nga e cila Haxhire Gurakuqi ka pësuar një dëm të madh për mundësitë e saj.
Në bankë i janë bllokuar 60 mijë lekë të reja kursime, pasi i thonë që është biznesmene dhe ka 5 milionë euro të pajustifikuara.
Si u përfshi Haxhirja në skemë?
Në Qendrën Kombëtare të Biznesit, Haxhire Gurakuqi e datëlindjes 1933, rezulton pronare në dy kompani, me aktivitet në fushën e ndërtimit dhe pajisjeve industriale- “Sopotonia” shpk dhe “Koleci 2003” shpk.
Më herët ajo ka qenë pronare në “Lumi -06”, kompani, e cila, sipas dokumentave të publikuara nga Kryemadhi, ka përfituar rreth 5 milionë euro nga skema e inceneratorëve.
Dokumentat zyrtarë tregojnë për një situatë interesante-emri i Haxhire Gurakuqit shoqërohet gjithnjë me të njëjtat emra të tjerë, anëtarë të familjes Murat, Thanas Çani dhe Kreshnik Ymeraj
I shohim me radhë.
“Sopotonia”
Kompania private është regjistruar në vitin 2014, fillimisht me emrin “XH-Y”, në pronësi të Kreshnik Ymeraj.
Në vitin 2017, kompania blihet nga Klevis Murati. Një vit më pas, në Mars 2018, ndryshon sërish pronësia. Tashmë, i pari i kompanisë është 85-vjeçari Thanas Çani.
Kryetari i Partisë Demokratike, Sali Berisha, deklaroi në një intervistë televizive të hënën e kësaj jave se Thanas Çani është kushëri i parë me ish-ministrin dhe Sekretarin e Përgjithshëm aktual të Partisë Socialiste, Damian Gjiknuri,
Në Gusht 2018, Thanas Çani i shet kompaninë sërish Klevis Muratit.
Shkojmë një vit më tej. Në Shkurt 2019, Klevis Murati ia shet kompaninë, e cila tashmë quhej “Sopotonia”, Haxhire Gurakuqit, 90-vjeçares që jetonte me qira.
Një muaj më pas, në mars 2019, kompania kalon në status pasiv dhe në këtë gjendje vijon ende.
“Koleci 2003” shpk
Kompania është regjistruar në Korrik 2008 nga Agim Xhuli, i cili në atë kohë ishte 85 vjeç. Dy vjet më pas, në maj 2010, pronësia e kompanisë i kalon të birit të tij, Artur Xhuli.
Në mars 2019, kompania kalon në status “pasiv”. Një muaj më vonë, Artur Xhuli i shet aksionet e kompanisë tek e moshuara Haxhire Gurakuqi.
Shoqëria vijon të jetë pasive.
“Lumi -06” shpk
Kompania “Lumi 06” është ajo që, sipas dokumentave të publikuar nga Kryemadhi, ka siguruar miliona euro fitime për 90-vjeçaren Haxhire Gurakuqi dhe i sjell dëmin më të madh-i ka bllokuar 60 mijë lekë kursime të jetës në bankë.
Kompania “Lumi – 06” shpk është regjistruar në vitin 2016, në pronësi të Lumturije Muratit (nëna e Klevis Muratit që u shfaq tek kompania “Sopotonia”).
Në Dhjetor 2017, zonja Murati ia shet kompaninë Haxhire Gurakuqit.
Një vit më pas, e moshuara Gurakuqi ia shet sërish kompaninë Lumturije Muratit. Në korrik 2019, pronar i “Lumi -06” bëhet 85-vjeçari Thanas Çani.
Kompania është në status “pasiv”.
Djali i Haxhiresë
E moshuara Haxhire Gurakuqi është e ve dhe ka vetëm një djalë, Ardian Gurakuqi.
Ky emër nuk është i panjohur për kronikën policore. Ai u arrestua në vitin 2018, si një prej personave organizatorë të rrjetit të klandestinëve nga Shqipëria në drejtim të Shteteve të Bashkuara të Amerikës.
Në bazë të hetimeve të kryera nga ish-prokurori i Krimeve të Rënda, Eugen Beçi, ai akuzohej për veprat penale të “ Ndihmës për kalim të paligjshëm të kufijve” më shumë se një herë, kryer në formën e grupit të strukturuar kriminal.
Nga hetimet e Prokurorisë në atë kohë, rezultoi se një grup personash, ku përfshihej edhe Ardian Gurakuqi, në bashkëpunim me njeri tjetrin (brenda dhe jashtë shqipërie, shtetas shqiptarë dhe të huaj) kryejnë aktivitet në fushën e kontrabandimit të personave (shtetas shqiptarë kryesisht nga Tirana, Shkodra, Malësia e Madhe dhe Lezha), në drejtim të SHBA-së, Mbretërsie së Bashkuar dhe Kandasë, me dokumenta të fallsifikuara (të vendeve të Bashkimit Europian dhe të Turqisë) kundrejt një vlerë deri në 25.000.00 dollarë.
