Trajneri i Partizanit, Dritan Mehmeti, dha dje intervistën e fundit përpara nisjes për në Gjeorgji, ku Partizani do të sfidojë Saburtalon për turin e parë të Ligës së Konferencës. Në një prononcim për “Panorama Sport”, trajneri zbulon se Alban Hoxha do të mungojë, teksa shton se tashmë skuadra thuajse është konsoliduar dhe Partizani do të synojë të fitojë ndaj Saburtalos.
Si shkuan përgatitjet e skuadrës në Slloveni?
Pas fazës përgatitore, kemi qenë shumë mirë për sa i përket akomodimit në Slloveni, si dhe për sa i përket edhe fushës së hotelit, por edhe temperaturave. Ia ka vlejtur i gjithë shpenzimi dhe presim që të shfrytëzojmë kohën qe kemi punuar atje dhe shpresojmë të kemi rezultat pozitiv.
Sa shanse ka Partizani të kalojë Saburtalon dhe të shkojë në turin e dytë?
Që nga momenti që kemi mësuar se do të kemi Saburtalon përballë, kemi nisur ta studiojmë. Është një skuadër që filozofinë e mbështet duke u bazuar te lojtarët e rinj të talentuar. Kanë disa lojtarë në kombëtaren e Gjeorgjisë, por edhe te Shpresat. Kanë disa lojtarë të talentuar dhe jemi munduar që ta studiojmë deri në detaje dhe ta përshtatim gjithçka në varësi të kundërshtarit. Futbolli është i paparashikueshëm dhe nuk mund të them asgjë, do t’ia lëmë fushës. Ne punojmë për të marrë maksimumin dhe do të shkojmë për të përfaqësuar Partizanin siç duhet. Gjithmonë do të shkojmë për më të mirën.
A keni pasur probleme me dëmtimet gjatë kësaj kohe?
Kemi pasur problemin me Alban Hoxhës, gjatë fazës përgatitore në Slloveni dhe e kemi të pamundur ta kemi në ndeshjen e parë. Gjithashtu kemi problemin e Xhulios, i cili ka një problem kronik në shpatull, ku i shfaqen dhimbje herë pas here. Këto janë probleme normale që ndodhin në një skuadër futbolli. Për sa i përket kristalizimit të formacionit, mendoj se po plotësojmë detajet e fundit, në varësi edhe të kundërshtarit.
