Kryetarja e LSI, Monika Kryemadhi përmes një dalje për mediet sot ka bërë me dije se do të depozitojë një tjetër padi në SPAK për incineratorët.
Ajo tha se nga pamjet e marra nga inceneratori i Tiranës, ku janë bërë tre gropa dhe një kodër e mbuluar me dhe, por nuk ka asnjë lloj investimi.
Kryemadhi shtoi se janë rreth 24 kompani, që kanë bërë bashkëveprim financiar, shitje-blerje, me kompanitë e inceneratorëve, duke krijuar një evazion total në 189 milionë dollarë.
“Shihni videon e bërë dje nga inceneratori i Tiranës, ku janë bërë tre gropa dhe një kodër e mbuluar me dhe. Ajo që të bën përshtypje është se aty nuk ka asnjë lloj investimi, që e kemi dëgjuar nga kryeministri. Ajo që dua të theksoj dhe që është shumë e rëndësishme është se besoj që të gjithë e mbani mend që në dhjetor të 2021, ne si LSI i kemi shtuar kallëzimit tonë evazionin fiskal që ka ndodhur me kompanitë e Klodian Zotos”, tha Kryemadhi.
“Neve na rezultoi se Zoto kishte kryer evazion në mbi 30 milionë dollarë. Në periudhë pandemie ai kishte kryer udhëtime jashtë shtetit, kur mbi qiellin shqiptar nuk kishte fluturuar asnjë avion. Janë rreth 24 kompani, që kanë bërë bashkëveprim financiar, shitje-blerje, me kompanitë e inceneratorëve. Duke marrë në detaje të gjitha kompanitë, kemi kuptuar që evazioni i këtyre kompanive në total është 189 milionë dollarë”, shtoi ajo.
